har-gam tasawwur tha tumhaara mere aage

har-gām tasavvur thā tumhārā mire aage

manzil kā bahut saaf thā rasta mire aage

ik hech haqīqat hai ye duniyā mire aage

qatra ye rahā sūrat-e-dariyā mire aage

kyā chiiz hai duniyā kā bharosa mire aage

jab terā sahārā hai sahārā mire aage

andāza mire ġham kā lagā.egā koī kyā

hai merī tamanna kā janāza mire aage

ehsās-e-vajūd-e-ġham-e-dil ko na miTāo

hai bā.is-e-taskīñ ye tamāshā mire aage

dil rah hī gayā TuuT ke ik zarb-e-nazar se

kamzor thā kaisā ye khilaunā mire aage

lo haibat-e-tārīkī-e-shab toḌ chalī dam

aatā hai nazar duur ujālā mire aage

ik umr ke afsāne tumheñ kaise sunā.ūñ

ma.alūm nahīñ vaqt hai kitnā mire aage

dhaḌkan mire dil kī baḌhī jaatī hai sarāpā

phir ishq kā shāyad huā saudā mire aage

mumkin hī nahīñ hai ye 'kalīm' un ko bhulā duuñ

jab hai mire īmāñ kā taqāzā mire aage

har-gam tasawwur tha tumhaara mere aage

manzil ka bahut saf tha rasta mere aage

ek hech haqiqat hai ye duniya mere aage

qatra ye raha surat-e-dariya mere aage

kya chiz hai duniya ka bharosa mere aage

jab tera sahaara hai sahaara mere aage

andaza mere gham ka lagaega koi kya

hai meri tamanna ka janaza mere aage

ehsas-e-wajud-e-gham-e-dil ko na miTao

hai bais-e-taskin ye tamasha mere aage

dil rah hi gaya TuT ke ek zarb-e-nazar se

kamzor tha kaisa ye khilauna mere aage

lo haibat-e-tariki-e-shab toD chali dam

aata hai nazar dur ujala mere aage

ek umr ke afsane tumhein kaise sunaun

malum nahin waqt hai kitna mere aage

dhaDkan mere dil ki baDhi jati hai sarapa

phir ishq ka shayad hua sauda mere aage

mumkin hi nahin hai ye 'kalim' un ko bhula dun

jab hai mere iman ka taqaza mere aage