har ghaDi dard ki shiddat se bilakti aankhen

har ghaḌī dard kī shiddat se bilaktī āñkheñ

ātish-e-hijr se har lamha pighaltī āñkheñ

ek lamhe kī mulāqāt huī 'umr kā rog

us kī sūrat ko haiñ har vaqt tarastī āñkheñ

dil-e-betāb meñ ab tak vo machaltī ḳhvāhish

terī ḳhushbū se musalsal ye mahaktī āñkheñ

ḳhvāb meñ Thahrā huā jhiil kā niilā manzar

aur usī jhiil kināre haiñ bhaTaktī āñkheñ

ab to vahshat sī Tapaktī hai har ik manzar se

soz-e-hijrāñ kī tapish se haiñ sulagtī āñkheñ

'ishq nīlām huā 'aam yā nākām huā

rah ga.iiñ ahl-e-vafā kī to barastī āñkheñ

sāmne pā ke use dūsrī jānib taknā

ye haqīqat meñ haiñ 'shāhīn' sañbhaltī āñkheñ

har ghaDi dard ki shiddat se bilakti aankhen

aatish-e-hijr se har lamha pighalti aankhen

ek lamhe ki mulaqat hui 'umr ka rog

us ki surat ko hain har waqt tarasti aankhen

dil-e-betab mein ab tak wo machalti KHwahish

teri KHushbu se musalsal ye mahakti aankhen

KHwab mein Thahra hua jhil ka nila manzar

aur usi jhil kinare hain bhaTakti aankhen

ab to wahshat si Tapakti hai har ek manzar se

soz-e-hijran ki tapish se hain sulagti aankhen

'ishq nilam hua 'am ya nakaam hua

rah gain ahl-e-wafa ki to barasti aankhen

samne pa ke use dusri jaanib takna

ye haqiqat mein hain 'shahin' sanbhalti aankhen