har ghaDi har lamha uThte pattharon ke sath main

har ghaḌī har lamha uThte pattharoñ ke saath maiñ

TuuTe TuuTe kitne shīshoñ ke gharoñ ke saath maiñ

āñdhiyoñ ke dosh par sham.eñ jalātā roz o shab

qahr meñ biphrī havā ke lashkaroñ ke saath maiñ

sabza-zāroñ kī tamannā mujh meñ sargarm-e-safar safar

chilchilātī dhuup ke nāma-baroñ ke saath maiñ

rafta rafta shaam ke nā-mehrbāñ sailāb meñ

Dūbtā sā ujle ujle se paroñ ke saath maiñ

maiñ bhaTaktī ummatoñ kā ek dard-e-mushtarak

har zamāne meñ rahā paiġhambaroñ ke saath maiñ

dā.era-dar-dā.era chāroñ taraf bikhrā huā

ek samundar meñ sadā ke kañkaroñ ke saath maiñ

tū na jaane kin añdheroñ meñ chhupī baiThī huī

rāsta chuntā huā kitne Daroñ ke saath maiñ

har ghaDi har lamha uThte pattharon ke sath main

TuTe TuTe kitne shishon ke gharon ke sath main

aandhiyon ke dosh par shamen jalata roz o shab

qahr mein biphri hawa ke lashkaron ke sath main

sabza-zaron ki tamanna mujh mein sargarm-e-safar safar

chilchilati dhup ke nama-baron ke sath main

rafta rafta sham ke na-mehrban sailab mein

Dubta sa ujle ujle se paron ke sath main

main bhaTakti ummaton ka ek dard-e-mushtarak

har zamane mein raha paighambaron ke sath main

daera-dar-daera chaaron taraf bikhra hua

ek samundar mein sada ke kankaron ke sath main

tu na jaane kin andheron mein chhupi baiThi hui

rasta chunta hua kitne Daron ke sath main