har ghaDi shahr-e-KHamoshan ka saman rahta hai

har ghaḌī shahr-e-ḳhamoshāñ kā samāñ rahtā hai

dil kī bastī meñ shab-o-roz dhuāñ rahtā hai

merī badlī huī hālat kā bhī mafhūm samajh

in dinoñ mujh se ḳhafā dushman-e-jāñ rahtā hai

aa.ina toḌ ke kyoñ joḌ rahe haiñ sāhib

zaḳhm bhar jaatā hai par us kā nishāñ rahtā hai

mere vīrāne kī afsurda fazāoñ pe na jā

is ḳharābe meñ bhī ik sho.ala-ba-jāñ rahtā hai

sard hotā hī nahīñ mausam-e-yaḳh-basta meñ

merī shiryānoñ meñ jo raqs-kunāñ rahtā hai

jaane vo kaun sī ḳhūbī kā hai mālik 'paikar'

saarī duniyā chalī aatī hai jahāñ rahtā hai

har ghaDi shahr-e-KHamoshan ka saman rahta hai

dil ki basti mein shab-o-roz dhuan rahta hai

meri badli hui haalat ka bhi mafhum samajh

in dinon mujh se KHafa dushman-e-jaan rahta hai

aaina toD ke kyon joD rahe hain sahib

zaKHm bhar jata hai par us ka nishan rahta hai

mere virane ki afsurda fazaon pe na ja

is KHarabe mein bhi ek shoala-ba-jaan rahta hai

sard hota hi nahin mausam-e-yaKH-basta mein

meri shiryanon mein jo raqs-kunan rahta hai

jaane wo kaun si KHubi ka hai malik 'paikar'

sari duniya chali aati hai jahan rahta hai