har ghaDi umr-e-faromaya ki qimat mange

har ghaḌī umr-e-faromāya kī qīmat māñge

mujh se ā.īna mirā merī hī sūrat māñge

duur rah kar hī jo āñkhoñ ko bhale lagte haiñ

dil-e-dīvāna magar un kī hī qurbat māñge

pūchhte kyā ho in āñkhoñ kī udāsī kā sabab

ḳhvāb jo dekhe vo ḳhvāboñ kī haqīqat māñge

apne dāman meñ chhupā le mire ashkoñ ke charāġh

aur kyā tujh se koī ai shab-e-furqat māñge

vo nigah kahtī hai baiThe raho mahfil meñ abhī

dil kī āshuftagī uThne kī ijāzat māñge

zahr pī kar bhī jiyūñ maiñ ye alag baat magar

zindagī us lab-e-rañgīñ kī halāvat māñge

zeb dete nahīñ ye turra-o-dastār mujhe

merī shorīda-sarī sañg-e-malāmat māñge

har ghaDi umr-e-faromaya ki qimat mange

mujh se aaina mera meri hi surat mange

dur rah kar hi jo aankhon ko bhale lagte hain

dil-e-diwana magar un ki hi qurbat mange

puchhte kya ho in aankhon ki udasi ka sabab

KHwab jo dekhe wo KHwabon ki haqiqat mange

apne daman mein chhupa le mere ashkon ke charagh

aur kya tujh se koi ai shab-e-furqat mange

wo nigah kahti hai baiThe raho mahfil mein abhi

dil ki aashuftagi uThne ki ijazat mange

zahr pi kar bhi jiyun main ye alag baat magar

zindagi us lab-e-rangin ki halawat mange

zeb dete nahin ye turra-o-dastar mujhe

meri shorida-sari sang-e-malamat mange