har guzarta pal naya ek masala deta gaya

har guzartā pal nayā ik mas.ala detā gayā

har guzartā din na.e ġham kā pata detā gayā

tapte sahrā se tamanna chhāñv kī be-sūd thī

ham ki chalte hī ga.e vo aabla detā gayā

dasht-e-furqat jān-levā ho gayā us dam mujhe

ik tasavvur aap kā bas hausla detā gayā

mubtalā-e-gardish-e-hālāt maiñ jab jab huā

mujh ko saaya apnī rahmat kā ḳhudā detā gayā

bas ye e.ajāz-e-mohabbat thā ki merī qabr par

sang-dil se sang-dil bhī fātiha detā gayā

vasf-e-fann-e-shā.irī miltā gayā juuñ juuñ mujhe

maiñ bhī thā faiyyaz bas letā gayā detā gayā

allah allah naza.a kā aalam thā lekin vo 'habīb'

jaate jaate mujh ko jiine kī duā detā gayā

har guzarta pal naya ek masala deta gaya

har guzarta din nae gham ka pata deta gaya

tapte sahra se tamanna chhanw ki be-sud thi

hum ki chalte hi gae wo aabla deta gaya

dasht-e-furqat jaan-lewa ho gaya us dam mujhe

ek tasawwur aap ka bas hausla deta gaya

mubtala-e-gardish-e-haalat main jab jab hua

mujh ko saya apni rahmat ka KHuda deta gaya

bas ye eajaz-e-mohabbat tha ki meri qabr par

sang-dil se sang-dil bhi fatiha deta gaya

wasf-e-fann-e-shairi milta gaya jun jun mujhe

main bhi tha faiyyaz bas leta gaya deta gaya

allah allah naza ka aalam tha lekin wo 'habib'

jate jate mujh ko jine ki dua deta gaya