har har shajar umid tha har har shajar tha yas

har har shajar umiid thā har har shajar thā yaas

har har shajar kī chhāoñ meñ ik shahr ban gayā

phūlā-phalā thā vaqt ke hāthoñ to vaqt hī

sahrā-e-ārzū ke liye zahr ban gayā

namnāk rū-e-shām pe gul-chāñdnī kā rang

jalte pe tel sā hī koī qahr ban gayā

bādal kā āsmān pe bantā bigaḌtā ruup

yād-e-mizāj-e-yār kī ik lahr ban gayā

shab ko tirā ḳhayāl sukūt-e-namāz meñ

āmīn kī hikāyat-e-bil-jahr ban gayā

har har shajar umid tha har har shajar tha yas

har har shajar ki chhaon mein ek shahr ban gaya

phula-phala tha waqt ke hathon to waqt hi

sahra-e-arzu ke liye zahr ban gaya

namnak ru-e-sham pe gul-chandni ka rang

jalte pe tel sa hi koi qahr ban gaya

baadal ka aasman pe banta bigaDta rup

yaad-e-mizaj-e-yar ki ek lahr ban gaya

shab ko tera KHayal sukut-e-namaz mein

aamin ki hikayat-e-bil-jahr ban gaya