har ek dil yahan hai mohabbat se aari

har ik dil yahāñ hai mohabbat se aarī

tumhīñ ko mubārak ye duniyā tumhārī

unheñ ham se baḌh ke hai ġhairoñ kī parvā

nibāheñge kab tak hamīñ vaz.a-dārī

rahā hai yahāñ par na koī rahegā

jo hai aaj us kī to kal apnī baarī

abhī tak na badlī mohabbat kī qismat

abhī tak mohabbat meñ hai be-qarārī

qadam-ranja farmā rahe haiñ vo āḳhir

ḳhabar lā rahī hai ye bād-e-bahārī

qasam hai ye tum ko na aañsū bahānā

kabhī yaad aa.e jo tum ko hamārī

na badlā na badlā hasīnoñ kā sheva

vahī tīr-o-nashtar vahī dil-figārī

huuñ mamnūn-e-ehsāñ ḳhudā jāntā hai

hai shāmil tabī.at meñ bhī sharmsārī

tire 'soz' kī yuuñ basar ho rahī hai

na ġhairoñ se matlab na apnoñ se yaarī

har ek dil yahan hai mohabbat se aari

tumhin ko mubarak ye duniya tumhaari

unhen hum se baDh ke hai ghairon ki parwa

nibahenge kab tak hamin waza-dari

raha hai yahan par na koi rahega

jo hai aaj us ki to kal apni bari

abhi tak na badli mohabbat ki qismat

abhi tak mohabbat mein hai be-qarari

qadam-ranja farma rahe hain wo aaKHir

KHabar la rahi hai ye baad-e-bahaari

qasam hai ye tum ko na aansu bahana

kabhi yaad aae jo tum ko hamari

na badla na badla hasinon ka shewa

wahi tir-o-nashtar wahi dil-figari

hun mamnun-e-ehsan KHuda jaanta hai

hai shamil tabiat mein bhi sharmsari

tere 'soz' ki yun basar ho rahi hai

na ghairon se matlab na apnon se yari