har ek ke dukh pe jo ahl-e-qalam taDapta tha

har ik ke dukh pe jo ahl-e-qalam taḌaptā thā

ḳhud us kā apnā har ik dard us pe hañstā thā

maiñ aaj kyuuñ tah-e-dāmāñ bhī jal nahīñ saktā

mirā hī sho'la havāoñ pe kal lapaktā thā

zamāne-bhar kī adāoñ ko sah rahā huuñ aaj

kabhī maiñ apnī adāoñ se bhī bigaḌtā thā

vo merī shakl se bezār ho rahā hai aaj

jo shaḳhs kal mirī āvāz ko tarastā thā

tamām shab jise baḳhshe the reshmī gesū

sahar huī to vo sar daar par laTaktā thā

mirī giraft meñ kaun-o-makāñ kī baag thī jab

mirā vujūd mirī ruuh se laraztā thā

har ik se Dartā huuñ maiñ aaj ik ḳhudā ke sivā

kabhī vo din the ki bas ik ḳhudā se Dartā thā

lo aaj tū ne bhī dīvāna kah diyā mujh ko

tire hī dil meñ to merā suḳhan utartā thā

ye kyā kiyā mujhe merī nazar se chhīn liyā

usī lahū se charāġh-e-vajūd jaltā thā

kisī sitam meñ bhī ik raunaq-e-ta.alluq hai

vagarna yuuñ to maiñ tanhā.iyoñ meñ Dhaltā thā

tirā sañbhalnā bhī girnā hai in dinoñ 'dārā'

kahāñ vo din ki tū girne meñ bhī sañbhaltā thā

har ek ke dukh pe jo ahl-e-qalam taDapta tha

KHud us ka apna har ek dard us pe hansta tha

main aaj kyun tah-e-daman bhi jal nahin sakta

mera hi sho'la hawaon pe kal lapakta tha

zamane-bhar ki adaon ko sah raha hun aaj

kabhi main apni adaon se bhi bigaDta tha

wo meri shakl se bezar ho raha hai aaj

jo shaKHs kal meri aawaz ko tarasta tha

tamam shab jise baKHshe the reshmi gesu

sahar hui to wo sar dar par laTakta tha

meri giraft mein kaun-o-makan ki bag thi jab

mera wujud meri ruh se larazta tha

har ek se Darta hun main aaj ek KHuda ke siwa

kabhi wo din the ki bas ek KHuda se Darta tha

lo aaj tu ne bhi diwana kah diya mujh ko

tere hi dil mein to mera suKHan utarta tha

ye kya kiya mujhe meri nazar se chhin liya

usi lahu se charagh-e-wajud jalta tha

kisi sitam mein bhi ek raunaq-e-talluq hai

wagarna yun to main tanhaiyon mein Dhalta tha

tera sanbhalna bhi girna hai in dinon 'dara'

kahan wo din ki tu girne mein bhi sanbhalta tha