har ek lamha hamein humse juda karti hui si

har ik lamha hameñ ham se judā kartī huī sī

hamāre biich dīvār-e-anā bantī huī sī

laraztī kāñptī misl-e-hayā simTī huī sī

mirī jānib baḌhī us kī sadā sahmī huī sī

vahī manzar laraztā hai nigāhoñ meñ abhī tak

darīche haath phailā.e havā rūThī huī sī

tire qadmoñ kī aahaT rahguzar-dar-rahguzar raushan

tirī aamad kī ḳhushbū jā-ba-jā bikhrī huī sī

sabhī mānūs chehre ajnabī se lag rahe haiñ

hameñ jiine nahīñ degī fazā badlī huī sī

nigāhoñ ke ufuq hairāniyoñ ke abr meñ gum

koī shai aa.ine meñ rūnumā hotī huī sī

na jaane kis tabāhī kī taraf le jā.egī ab

hamārī zindagī be-sāḳhta baḌhtī huī sī

mujhe mujh se alag karne pe āmāda hai 'aḳhtar'

mirī pahchān mujh se āshnā hotī huī sī

har ek lamha hamein hum se juda karti hui si

hamare bich diwar-e-ana banti hui si

larazti kanpti misl-e-haya simTi hui si

meri jaanib baDhi us ki sada sahmi hui si

wahi manzar larazta hai nigahon mein abhi tak

dariche hath phailae hawa ruThi hui si

tere qadmon ki aahaT rahguzar-dar-rahguzar raushan

teri aamad ki KHushbu ja-ba-ja bikhri hui si

sabhi manus chehre ajnabi se lag rahe hain

hamein jine nahin degi faza badli hui si

nigahon ke ufuq hairaniyon ke abr mein gum

koi shai aaine mein runuma hoti hui si

na jaane kis tabahi ki taraf le jaegi ab

hamari zindagi be-saKHta baDhti hui si

mujhe mujh se alag karne pe aamada hai 'aKHtar'

meri pahchan mujh se aashna hoti hui si