har ek rawish pe tera naqsh-e-pa nazar aae

har ik ravish pe tirā naqsh-e-pā nazar aa.e

chalūñ maiñ kaise na jab rāsta nazar aa.e

hai jaise jurm kā ehsās yā haqīqat hai

har ek shaḳhs mujhe dekhtā nazar aa.e

kise ḳhabar ki farebī hai kaun muḳhlis kaun

jise bhī dekho vo yuuñ to bhalā nazar aa.e

maiñ rāh-e-zīst pe huuñ muntazir khaḌī kab se

kabhī to koī sukūñ bechtā nazar aa.e

'humairā' zaat ke is ḳhol se zarā niklo

to dekho chehra har ik ġham-zada nazar aa.e

har ek rawish pe tera naqsh-e-pa nazar aae

chalun main kaise na jab rasta nazar aae

hai jaise jurm ka ehsas ya haqiqat hai

har ek shaKHs mujhe dekhta nazar aae

kise KHabar ki farebi hai kaun muKHlis kaun

jise bhi dekho wo yun to bhala nazar aae

main rah-e-zist pe hun muntazir khaDi kab se

kabhi to koi sukun bechta nazar aae

'humaira' zat ke is KHol se zara niklo

to dekho chehra har ek gham-zada nazar aae