har ek sada mein yahan dusri sada hai koi

har ik sadā meñ yahāñ dūsrī sadā hai koī

har ek lamha yahī Dar bichhaḌ rahā hai koī

surāġh pā na sakā Dagmagāte qadmoñ kā

hamāre pīchhe bahut duur tak gayā hai koī

navāh-e-jāñ meñ ajab chāñdnī chamaktī hai

ki jaise ruuh ke andar utar gayā hai koī

hamārī aañkh ujāloñ se muuñd kar shāyad

hamāre zaḳhm añdheroñ se bhar gayā hai koī

sajā lo is ko yahāñ tāq-e-har-samā.at meñ

phir is ke baad bahut duur kī sadā hai koī

dayār-e-jism meñ bas ek ġham kā chehrā hai

fazā udaas hai jaise ki mar gayā hai koī

har ek sada mein yahan dusri sada hai koi

har ek lamha yahi Dar bichhaD raha hai koi

suragh pa na saka Dagmagate qadmon ka

hamare pichhe bahut dur tak gaya hai koi

nawah-e-jaan mein ajab chandni chamakti hai

ki jaise ruh ke andar utar gaya hai koi

hamari aankh ujalon se mund kar shayad

hamare zaKHm andheron se bhar gaya hai koi

saja lo is ko yahan taq-e-har-samaat mein

phir is ke baad bahut dur ki sada hai koi

dayar-e-jism mein bas ek gham ka chehra hai

faza udas hai jaise ki mar gaya hai koi