har ek sitam ko miTa do nai sadi ke liye

har ik sitam ko miTā do na.ī sadī ke liye

diloñ meñ pyaar jagā do na.ī sadī ke liye

jo gahre zaḳhm diye bīsvīñ sadī ne hameñ

vo saare zaḳhm bhulā do na.ī sadī ke liye

lagā chuke jise arbāb-e-iqtidār-o-havas

uTho vo aag bujhā do na.ī sadī ke liye

lahū ke daaġh bhī miT jā.eñge ḳhizāñ kī tarah

zamīñ ko sabz banā do na.ī sadī ke liye

rivāyatoñ ke añdhere bahut haiñ duniyā meñ

na.e charāġh jalā do na.ī sadī ke liye

fazā meñ ḳhuun na uchhle kisī kā ghar na jale

nizām aisā banā do na.ī sadī ke liye

jihād-e-'ilm-o-hunar ke diye karo raushan

har ek ghar ko sajā do na.ī sadī ke liye

yahī hai rāz-e-taraqqī ki apne bachchoñ kā

nayā mizāj banā do na.ī sadī ke liye

jo zehn-o-dil ke añdhere miTā sake 'razmī'

ġhazal ik aisī sunā do na.ī sadī ke liye

har ek sitam ko miTa do nai sadi ke liye

dilon mein pyar jaga do nai sadi ke liye

jo gahre zaKHm diye biswin sadi ne hamein

wo sare zaKHm bhula do nai sadi ke liye

laga chuke jise arbab-e-iqtidar-o-hawas

uTho wo aag bujha do nai sadi ke liye

lahu ke dagh bhi miT jaenge KHizan ki tarah

zamin ko sabz bana do nai sadi ke liye

riwayaton ke andhere bahut hain duniya mein

nae charagh jala do nai sadi ke liye

faza mein KHun na uchhle kisi ka ghar na jale

nizam aisa bana do nai sadi ke liye

jihad-e-'ilm-o-hunar ke diye karo raushan

har ek ghar ko saja do nai sadi ke liye

yahi hai raaz-e-taraqqi ki apne bachchon ka

naya mizaj bana do nai sadi ke liye

jo zehn-o-dil ke andhere miTa sake 'razmi'

ghazal ek aisi suna do nai sadi ke liye