har ek uThan ke lakhon hain imtihan miyan

har ik uThān ke lākhoñ haiñ imtihān miyāñ

pukārtā hai parindoñ ko āsmān miyāñ

nikalnā paḌtā hai āḳhir ko apne andar se

vahāñ bhī miltī nahīñ mustaqil amaan miyāñ

hai kārḳhāna tavahhum kā ye ba-qaul-e-'mīr'

so jānte haiñ yaqīñ ko bhī ham gumān miyāñ

thā is se pahle bhī koī makīn-e-dil apnā

aur is ke baad bhī ḳhālī nahīñ makān miyāñ

ye aur baat ki jismoñ ke bhī taqāze the

ham us kī jaan the aur vo hamārī jaan miyāñ

haiñ go ki ham bhī tire ḳhair-ḳhvāh par 'shākir'

ye kab kahā ki hamārī hī baat maan miyāñ

har ek uThan ke lakhon hain imtihan miyan

pukarta hai parindon ko aasman miyan

nikalna paDta hai aaKHir ko apne andar se

wahan bhi milti nahin mustaqil aman miyan

hai karKHana tawahhum ka ye ba-qaul-e-'mir'

so jaante hain yaqin ko bhi hum guman miyan

tha is se pahle bhi koi makin-e-dil apna

aur is ke baad bhi KHali nahin makan miyan

ye aur baat ki jismon ke bhi taqaze the

hum us ki jaan the aur wo hamari jaan miyan

hain go ki hum bhi tere KHair-KHwah par 'shakir'

ye kab kaha ki hamari hi baat man miyan