har ek zaban pe jari hai nam pahle se

har ik zabān pe jaarī hai naam pahle se

abhī tum aa.e nahīñ aur maqām pahle se

isī liye to use vaar karne denā hai

ki le chukā huuñ koī intiqām pahle se

abhī to Thiik se Dhalte nahīñ haiñ saa.e bhī

manā.ī jā chukī hotī hai shaam pahle se

pahuñch rahe haiñ jahāñ shāhzāde us ke liye

khaḌā huā hai vahāñ ik ġhulām pahle se

maiñ she'r kahte hue ehtiyāt kartā huuñ

kahīñ kiyā na gayā ho ye kaam pahle se

husain baa'd meñ pahuñche miyān-e-karb-o-balā

likhā huā thā ḳhudā ne salām pahle se

har ek zaban pe jari hai nam pahle se

abhi tum aae nahin aur maqam pahle se

isi liye to use war karne dena hai

ki le chuka hun koi intiqam pahle se

abhi to Thik se Dhalte nahin hain sae bhi

manai ja chuki hoti hai sham pahle se

pahunch rahe hain jahan shahzade us ke liye

khaDa hua hai wahan ek ghulam pahle se

main she'r kahte hue ehtiyat karta hun

kahin kiya na gaya ho ye kaam pahle se

husain ba'd mein pahunche miyan-e-karb-o-bala

likha hua tha KHuda ne salam pahle se