har jagah KHud ko DhunDhta hun main

har jagah ḳhud ko DhūñDhtā huuñ maiñ

ek muddat se lāpata huuñ maiñ

tū kabhī soch bhī nahīñ saktā

kis qadar tujh ko sochtā huuñ maiñ

ḳhvāb aatā hai jab bhī jiine kā

apnī āñkhoñ ko chūmtā huuñ maiñ

baiTh jaatā hai dil raqīboñ kā

jab tire saath baiThtā huuñ maiñ

tū musallat hai soch par merī

tere lahje meñ boltā huuñ maiñ

terā chehra dikhā.ī detā hai

jab bhī ā.īna dekhtā huuñ maiñ

jang kaisī anā se hai 'kāshif'

jīt.tā huuñ na hārtā huuñ maiñ

har jagah KHud ko DhunDhta hun main

ek muddat se lapata hun main

tu kabhi soch bhi nahin sakta

kis qadar tujh ko sochta hun main

KHwab aata hai jab bhi jine ka

apni aankhon ko chumta hun main

baiTh jata hai dil raqibon ka

jab tere sath baiThta hun main

tu musallat hai soch par meri

tere lahje mein bolta hun main

tera chehra dikhai deta hai

jab bhi aaina dekhta hun main

jang kaisi ana se hai 'kashif'

jitta hun na haarta hun main