har jagah teri wakalat bhi kahan tak karte

har jagah terī vakālat bhī kahāñ tak karte

sab se laḌne kī jasārat bhī kahāñ tak karte

ik tajallī ne uḌā Daale sabhī hosh-o-havās

tuur kī aap ziyārat bhī kahāñ tak karte

nafrateñ bo ke mohabbat kā samar DhūñDte haiñ

is tarah ulTī zarā’at bhī kahāñ tak karte

shiddat-e-karb se āñkhoñ meñ na Thahre aañsū

ham tire ġham kī hifāzat bhī kahāñ tak karte

apne bigḌe hue hālāt se jo laḌte haiñ

mujh pe vo chashm-e-'ināyat bhī kahāñ tak karte

ab vo mausam na rahā 'ishq-o-mohabbat kā sanam

ham tire saath sharārat bhī kahāñ tak karte

is qadar log masā.il meñ ghire haiñ 'nāzir'

ham ko āsūda-e-rāhat bhī kahāñ tak karte

har jagah teri wakalat bhi kahan tak karte

sab se laDne ki jasarat bhi kahan tak karte

ek tajalli ne uDa Dale sabhi hosh-o-hawas

tur ki aap ziyarat bhi kahan tak karte

nafraten bo ke mohabbat ka samar DhunDte hain

is tarah ulTi zara’at bhi kahan tak karte

shiddat-e-karb se aankhon mein na Thahre aansu

hum tere gham ki hifazat bhi kahan tak karte

apne bigDe hue haalat se jo laDte hain

mujh pe wo chashm-e-'inayat bhi kahan tak karte

ab wo mausam na raha 'ishq-o-mohabbat ka sanam

hum tere sath shararat bhi kahan tak karte

is qadar log masail mein ghire hain 'nazir'

hum ko aasuda-e-rahat bhi kahan tak karte