har jalwe pe nigah kiye ja raha hun main

har jalve pe nigāh kiye jā rahā huuñ maiñ

āñkhoñ ko ḳhizr-e-rāh kiye jā rahā huuñ maiñ

miTne na paa.e tāzgī-e-lazzat-e-gunāh

tauba bhī gaah gaah kiye jā rahā huuñ maiñ

kaisī ye zindagī hai ki phir bhī hai shauq-e-zīst

gauhar-nafas ik aah kiye jā rahā huuñ maiñ

ashkoñ kī mash.aloñ ko farozāñ kiye hue

tai iltijā kī raah kiye jā rahā huuñ maiñ

ḳhud jis ke sāmne siper-andāḳhta hai husn

aisī bhī ik nigāh kiye jā rahā huuñ maiñ

shāyad kabhī vo bhuul ke rakkheñ idhar qadam

āñkhoñ ko farsh-e-rāh kiye jā rahā huuñ maiñ

baḌhtī hī jā rahī haiñ tirī kam-nigāhiyāñ

kyā dil meñ tere raah kiye jā rahā huuñ maiñ

zulmāt-e-dair-o-ka.aba meñ kuchh raushnī sī hai

shāyad koī gunāh kiye jā rahā huuñ maiñ

'mullā' har ek taaza musībat pe hañs ke aur

kaj gosha-e-kulāh kiye jā rahā huuñ maiñ

har jalwe pe nigah kiye ja raha hun main

aankhon ko KHizr-e-rah kiye ja raha hun main

miTne na pae tazgi-e-lazzat-e-gunah

tauba bhi gah gah kiye ja raha hun main

kaisi ye zindagi hai ki phir bhi hai shauq-e-zist

gauhar-nafas ek aah kiye ja raha hun main

ashkon ki mashalon ko farozan kiye hue

tai iltija ki rah kiye ja raha hun main

KHud jis ke samne siper-andaKHta hai husn

aisi bhi ek nigah kiye ja raha hun main

shayad kabhi wo bhul ke rakkhen idhar qadam

aankhon ko farsh-e-rah kiye ja raha hun main

baDhti hi ja rahi hain teri kam-nigahiyan

kya dil mein tere rah kiye ja raha hun main

zulmat-e-dair-o-kaba mein kuchh raushni si hai

shayad koi gunah kiye ja raha hun main

'mulla' har ek taza musibat pe hans ke aur

kaj gosha-e-kulah kiye ja raha hun main