har KHushi mujhse gurezan hai KHafa ho jaise

har ḳhushī mujh se gurezāñ hai ḳhafā ho jaise

us ne pahchān ke muñh pher liyā ho jaise

kuchh nigāhoñ ne kiyā merā ta'āqub yuuñ bhī

us ke kūche se guzarnā bhī ḳhatā ho jaise

us se ruḳhsat jo huā maiñ to ye mahsūs huā

duur tak vo bhī mire saath chalā ho jaise

toḌtā hai koī paimāñ to ye lagtā hai mujhe

aadmī apnī bulandī se girā ho jaise

hichkiyāñ aa.eñ to rah rah ke ye hotā hai gumāñ

mere haq meñ koī masrūf-e-du’ā ho jaise

hai ye 'ālam tirī yādeñ tujhe vāpas kar ke

hāfize meñ mire kuchh bhī na bachā ho jaise

un ke hote to na thī aisī udāsī 'afzal'

ziist ik nauha-e-be-harf-o-sadā ho jaise

har KHushi mujh se gurezan hai KHafa ho jaise

us ne pahchan ke munh pher liya ho jaise

kuchh nigahon ne kiya mera ta'aqub yun bhi

us ke kuche se guzarna bhi KHata ho jaise

us se ruKHsat jo hua main to ye mahsus hua

dur tak wo bhi mere sath chala ho jaise

toDta hai koi paiman to ye lagta hai mujhe

aadmi apni bulandi se gira ho jaise

hichkiyan aaen to rah rah ke ye hota hai guman

mere haq mein koi masruf-e-du’a ho jaise

hai ye 'alam teri yaaden tujhe wapas kar ke

hafize mein mere kuchh bhi na bacha ho jaise

un ke hote to na thi aisi udasi 'afzal'

zist ek nauha-e-be-harf-o-sada ho jaise