har KHushi tere liye har na-KHushi tere liye

har ḳhushī tere liye har nā-ḳhushī tere liye

ab to ham ne vaqf kar dī zindagī tere liye

ashk āñkhoñ meñ haiñ dil meñ bekalī tere liye

zindagī se duur haiñ ab zindagī tere liye

dard-e-dil marg-e-tamannā hashr-e-ġham soz-e-firāq

ham ne har aafat se kī hai dostī tere liye

allah allah ehtimām-e-jazba-e-zauq-e-niyāz

rok lī hai jaise ġhunchoñ ne hañsī tere liye

ab kisī se ham ġham-e-dil kī shikāyat kyā kareñ

ham ne jab ġham par luTā dī har ḳhushī tere liye

tū ne raushan kar diye bujhtī umīdoñ ke charāġh

ruuh āñkhoñ meñ palaT kar aa ga.ī tere liye

kal tire dam se añdherā bhī thā faḳhr-e-kā.enāt

aaj jaise ro rahī hai raushnī tere liye

ai ġham-e-dil tujh se thak kar māñgte haiñ sab ajal

maiñ ajal se māñgtā huuñ zindagī tere liye

vā.e-qismat aaj tū ne bhī use Thukrā diyā

jis ne duniyā bhar se chhoḌī dostī tere liye

har KHushi tere liye har na-KHushi tere liye

ab to hum ne waqf kar di zindagi tere liye

ashk aankhon mein hain dil mein bekali tere liye

zindagi se dur hain ab zindagi tere liye

dard-e-dil marg-e-tamanna hashr-e-gham soz-e-firaq

hum ne har aafat se ki hai dosti tere liye

allah allah ehtimam-e-jazba-e-zauq-e-niyaz

rok li hai jaise ghunchon ne hansi tere liye

ab kisi se hum gham-e-dil ki shikayat kya karen

hum ne jab gham par luTa di har KHushi tere liye

tu ne raushan kar diye bujhti umidon ke charagh

ruh aankhon mein palaT kar aa gai tere liye

kal tere dam se andhera bhi tha faKHr-e-kaenat

aaj jaise ro rahi hai raushni tere liye

ai gham-e-dil tujh se thak kar mangte hain sab ajal

main ajal se mangta hun zindagi tere liye

wae-qismat aaj tu ne bhi use Thukra diya

jis ne duniya bhar se chhoDi dosti tere liye