har KHushi tere nam ki maine

har ḳhushī tere naam kī maiñ ne

vaar dī tujh pe zindagī maiñ ne

ik piyāde ne maat shaah ko dī

chaal aisī bhī ik chalī maiñ ne

vaqt bhī muḳhtasar thā us ke paas

baat bhī muḳhtasar sī kī maiñ ne

jo ḳhulūs-o-vafā ke paikar haiñ

kam hī dekhe haiñ aadmī maiñ ne

aañkh ne jab kabhī baġhāvat kī

terī tasvīr dekh lī maiñ ne

kaash pūchhe kabhī mujhe aa kar

chhoḌ dī kyuuñ tirī galī maiñ ne

sub.h-zau roz pūchhtī hai mujhe

kis tarah shab guzār dī maiñ ne

mujh ko sarvat kī yaad aa.ī hai

rail dekhī hai jab kabhī maiñ ne

ab mirī laash se savāl karo

kis tarah kī hai ḳhud-kushī maiñ ne

merī chaukhaT pe ġham chalā aayā

sauñp dī us ko har ḳhushī maiñ ne

vasl ko ḳhud pe oḌh ke 'ansar'

hijr kī dāstāñ likhī maiñ ne

har KHushi tere nam ki main ne

war di tujh pe zindagi main ne

ek piyaade ne mat shah ko di

chaal aisi bhi ek chali main ne

waqt bhi muKHtasar tha us ke pas

baat bhi muKHtasar si ki main ne

jo KHulus-o-wafa ke paikar hain

kam hi dekhe hain aadmi main ne

aankh ne jab kabhi baghawat ki

teri taswir dekh li main ne

kash puchhe kabhi mujhe aa kar

chhoD di kyun teri gali main ne

subh-zau roz puchhti hai mujhe

kis tarah shab guzar di main ne

mujh ko sarwat ki yaad aai hai

rail dekhi hai jab kabhi main ne

ab meri lash se sawal karo

kis tarah ki hai KHud-kushi main ne

meri chaukhaT pe gham chala aaya

saunp di us ko har KHushi main ne

wasl ko KHud pe oDh ke 'ansar'

hijr ki dastan likhi main ne