har KHwab yaad rakhne ka paida sabab karen

har ḳhvāb yaad rakhne kā paidā sabab kareñ

jo aaj tak na kar sake vo kaam ab kareñ

hone lagā yahāñ pe balāoñ kā phir nuzūl

ab kuchh na kar sakeñge chalo zikr-e-rab kareñ

jugnū-misāl ḳhud ko jalā.eñge raat bhar

mā'mūr is tarīqe se vo tīra-shab kareñ

ham ne to us kā saath nibhāyā hai der tak

ab us se duur jaane kā kār-e-ajab kareñ

sab jiit par manāte haiñ aksar yahāñ pe jashn

ham kyoñ bapā na haar pe jashn-e-tarab kareñ

āsūda jism-o-jāñ hoñ kabhī shahr-e-sang meñ

vā is umiid par na yahāñ chashm-o-lab kareñ

lahroñ ke saath aane lagī ret pai-ba-pai

kab tak darāz ham yūñhī dast-e-talab kareñ

dhuñdlā gayā hai izz-o-sharaf kā har ek naqsh

ab kis umiid par yahāñ fikr-e-nasab kareñ

har KHwab yaad rakhne ka paida sabab karen

jo aaj tak na kar sake wo kaam ab karen

hone laga yahan pe balaon ka phir nuzul

ab kuchh na kar sakenge chalo zikr-e-rab karen

jugnu-misal KHud ko jalaenge raat bhar

ma'mur is tariqe se wo tira-shab karen

hum ne to us ka sath nibhaya hai der tak

ab us se dur jaane ka kar-e-ajab karen

sab jit par manate hain aksar yahan pe jashn

hum kyon bapa na haar pe jashn-e-tarab karen

aasuda jism-o-jaan hon kabhi shahr-e-sang mein

wa is umid par na yahan chashm-o-lab karen

lahron ke sath aane lagi ret pai-ba-pai

kab tak daraaz hum yunhi dast-e-talab karen

dhundla gaya hai izz-o-sharaf ka har ek naqsh

ab kis umid par yahan fikr-e-nasab karen