ہر کسی کو ہے خیال آشیاں کچھ ان دنوں

ہر کسی کو ہے خیال آشیاں کچھ ان دنوں

کاش ہوتی سب کو فکر گلستاں کچھ ان دنوں

کیوں نہ ہو برہم مزاج پاسباں کچھ ان دنوں

بدلی بدلی ہے ہوائے گلستاں کچھ ان دنوں

اس نوازش کے پس پردہ کوئی سازش نہ ہو

ہو رہے ہیں وہ جو ہم پہ مہرباں کچھ ان دنوں

اس خموشی اور گویائی کا عالم کیا کہوں

ہر نظر ہے اک مکمل داستاں کچھ ان دنوں

خیر ہو دامان ہستی کی الٰہی خیر ہو

ہے جنوں پرور بہار گلستاں کچھ ان دنوں

بے خودی میں بھی ہوں میں راز خودی سے آشنا

عین بیداری ہے یہ خواب گراں کچھ ان دنوں

دے رہی ہیں ہر نفس کو دعوت فکر و نظر

یہ مزاج دہر کی تبدیلیاں کچھ ان دنوں

دیکھنا اک دن الٹ دوں گا بساط یاس و غم

کہہ رہا ہے یہ دل گرم و جواں کچھ ان دنوں

ہوشیار اے رہروان راہ ہستی ہوشیار

راہزن بنتے ہیں میر کارواں کچھ ان دنوں

دیکھنا یہ ہے کہ دل اکسیر ہو جاتا ہے کب

ہر نفس تو ہے مرا آتش بجاں کچھ ان دنوں

اہل دل اہل نظر اہل وفا کی خیر ہو

محو آرایش ہے پھر حسن بتاں کچھ ان دنوں

لے اڑوں گا دیکھنا دام و قفس کو ایک دن

آ رہے ہیں یاد اہل گلستاں کچھ ان دنوں

یہ مری صحرا نوردی رنگ لائے گی ضرور

کہہ رہی ہے دیکھ کانٹوں کی زباں کچھ ان دنوں

اب نہ وہ شوق عبودیت نہ ذوق بندگی

ہر جبیں ہے بے نیاز آستاں کچھ ان دنوں

بات کیا ہے کھویا کھویا سا نظر آتا ہے کیوں

فیضیؔٔ رنگیں نوا جادو بیاں کچھ ان دنوں