har kisi ko hai KHayal-e-ashiyan kuchh in dinon

har kisī ko hai ḳhayāl-e-āshiyāñ kuchh in dinoñ

kaash hotī sab ko fikr-e-gulsitāñ kuchh in dinoñ

kyoñ na ho barham mizāj-e-pāsbāñ kuchh in dinoñ

badlī badlī hai havā-e-gulsitāñ kuchh in dinoñ

is navāzish ke pas-e-parda koī sāzish na ho

ho rahe haiñ vo jo ham pe mehrbāñ kuchh in dinoñ

is ḳhamoshī aur goyā.ī kā aalam kyā kahūñ

har nazar hai ik mukammal dāstāñ kuchh in dinoñ

ḳhair ho dāmān-e-hastī kī ilāhī ḳhair ho

hai junūñ-parvar bahār-e-gulsitāñ kuchh in dinoñ

be-ḳhudī meñ bhī huuñ maiñ rāz-e-ḳhudī se āshnā

ain-bedārī hai ye ḳhvāb-e-girāñ kuchh in dinoñ

de rahī haiñ har nafas ko dāvat-e-fikr-o-nazar

ye mizāj-e-dahr kī tabdīliyāñ kuchh in dinoñ

dekhnā ik din ulaT dūñgā bisāt-e-yās-o-ġham

kah rahā hai yeh dil-e-garm-o-javāñ kuchh in dinoñ

hoshiyār ai rahravān-e-rāh-e-hastī hoshiyār

rāhzan bante haiñ mīr-e-kārvāñ kuchh in dinoñ

dekhnā ye hai ki dil iksīr ho jaatā hai kab

har nafas to hai mirā ātash-bajāñ kuchh in dinoñ

ahl-e-dil ahl-e-nazar ahl-e-vafā kī ḳhair ho

mahv-e-ārā.ish hai phir husn-e-butāñ kuchh in dinoñ

le uḌūñgā dekhnā dām-o-qafas ko ek din

aa rahe haiñ yaad ahl-e-gulsitāñ kuchh in dinoñ

ye mirī sahrā-navardī rang lā.egī zarūr

kah rahī hai dekh kāñToñ kī zabāñ kuchh in dinoñ

ab na vo shauq-e-ubūdiyyat na zauq-e-bandagī

har jabīñ hai be-niyāz-e-āstāñ kuchh in dinoñ

baat kyā hai khoyā khoyā sā nazar aatā hai kyoñ

'faizī'-e-rangīñ-navā jādū-bayāñ kuchh in dinoñ

har kisi ko hai KHayal-e-ashiyan kuchh in dinon

kash hoti sab ko fikr-e-gulsitan kuchh in dinon

kyon na ho barham mizaj-e-pasban kuchh in dinon

badli badli hai hawa-e-gulsitan kuchh in dinon

is nawazish ke pas-e-parda koi sazish na ho

ho rahe hain wo jo hum pe mehrban kuchh in dinon

is KHamoshi aur goyai ka aalam kya kahun

har nazar hai ek mukammal dastan kuchh in dinon

KHair ho daman-e-hasti ki ilahi KHair ho

hai junun-parwar bahaar-e-gulsitan kuchh in dinon

be-KHudi mein bhi hun main raaz-e-KHudi se aashna

ain-bedari hai ye KHwab-e-giran kuchh in dinon

de rahi hain har nafas ko dawat-e-fikr-o-nazar

ye mizaj-e-dahr ki tabdiliyan kuchh in dinon

dekhna ek din ulaT dunga bisat-e-yas-o-gham

kah raha hai yeh dil-e-garm-o-jawan kuchh in dinon

hoshiyar ai rahrawan-e-rah-e-hasti hoshiyar

rahzan bante hain mir-e-karwan kuchh in dinon

dekhna ye hai ki dil iksir ho jata hai kab

har nafas to hai mera aatash-bajaan kuchh in dinon

ahl-e-dil ahl-e-nazar ahl-e-wafa ki KHair ho

mahw-e-araish hai phir husn-e-butan kuchh in dinon

le uDunga dekhna dam-o-qafas ko ek din

aa rahe hain yaad ahl-e-gulsitan kuchh in dinon

ye meri sahra-nawardi rang laegi zarur

kah rahi hai dekh kanTon ki zaban kuchh in dinon

ab na wo shauq-e-ubudiyyat na zauq-e-bandagi

har jabin hai be-niyaz-e-astan kuchh in dinon

baat kya hai khoya khoya sa nazar aata hai kyon

'faizi'-e-rangin-nawa jadu-bayan kuchh in dinon