har kisi se to guzarish nahin ki ja sakti

har kisī se to guzārish nahīñ kī jā saktī

tere baare meñ numā.ish nahīñ kī jā saktī

yuuñ to is dil se guzarte ho ka.ī barsoñ se

kyā kabhī is meñ rihā.ish nahīñ kī jā saktī

sāmne tū ho to bas dekhte rahnā hai mujhe

aise hālāt meñ jumbish nahīñ kī jā saktī

terī āñkhoñ se to ho saktī haiñ bāteñ lekin

tujh ko chhū lene kī koshish nahīñ kī jā saktī

zindagī sauñp to dī hai tujhe ham ne lekin

'umr bhar aisī navāzish nahīñ kī jā saktī

tū jo aa jaa.e to ho jā.egā jal-thal mausam

ḳhushk āñkhoñ se to bārish nahīñ kī jā saktī

maiñ to barbād huuñ pahle hī ye sab jānte haiñ

kyā koī aur bhī sāzish nahīñ kī jā saktī

bad-gumānī vo mire baare meñ rakhtā hai bahut

mere she'roñ se to ranjish nahīñ kī jā saktī

maiñ salīqe se guzartā huuñ vahāñ se 'shahzād'

is se baḌh kar to parastish nahīñ kī jā saktī

har kisi se to guzarish nahin ki ja sakti

tere bare mein numaish nahin ki ja sakti

yun to is dil se guzarte ho kai barson se

kya kabhi is mein rihaish nahin ki ja sakti

samne tu ho to bas dekhte rahna hai mujhe

aise haalat mein jumbish nahin ki ja sakti

teri aankhon se to ho sakti hain baaten lekin

tujh ko chhu lene ki koshish nahin ki ja sakti

zindagi saunp to di hai tujhe hum ne lekin

'umr bhar aisi nawazish nahin ki ja sakti

tu jo aa jae to ho jaega jal-thal mausam

KHushk aankhon se to barish nahin ki ja sakti

main to barbaad hun pahle hi ye sab jaante hain

kya koi aur bhi sazish nahin ki ja sakti

bad-gumani wo mere bare mein rakhta hai bahut

mere she'ron se to ranjish nahin ki ja sakti

main saliqe se guzarta hun wahan se 'shahzad'

is se baDh kar to parastish nahin ki ja sakti