har koi Duba hua tha sazishon ki jhil mein

har koī Duubā huā thā sāzishoñ kī jhiil meñ

zehn kī kashtī thī apnī hairatoñ kī jhiil meñ

āsmāñ par uḌte uḌte lahr khā kar gir paḌā

aarzū kā ik parinda hādsoñ kī jhiil meñ

ab idhar aatī nahīñ haiñ ḳhvāhishoñ kī hirniyāñ

yaad kī daldal bahut hai uljhanoñ kī jhiil meñ

phir uchhāle kis ne āvāzoñ ke kankar arsh par

jab mukammal ḳhāmushī thī sā.atoñ kī jhiil meñ

azmatoñ kī kuchh sunahrī machhliyāñ paidā huiiñ

raushnī ke ujle ujle tazkaroñ kī jhiil meñ

yās-o-hasrat kā sahīfa hai hamārī zindagī

ham nahāte haiñ muqaddas āyatoñ kī jhiil meñ

vādī-e-hasrat meñ 'jāmī' hādisa aisā huā

karb kā tūfān uTThā qahqahoñ kī jhiil meñ

har koi Duba hua tha sazishon ki jhil mein

zehn ki kashti thi apni hairaton ki jhil mein

aasman par uDte uDte lahr kha kar gir paDa

aarzu ka ek parinda hadson ki jhil mein

ab idhar aati nahin hain KHwahishon ki hirniyan

yaad ki daldal bahut hai uljhanon ki jhil mein

phir uchhaale kis ne aawazon ke kankar arsh par

jab mukammal KHamushi thi saaton ki jhil mein

azmaton ki kuchh sunahri machhliyan paida huin

raushni ke ujle ujle tazkaron ki jhil mein

yas-o-hasrat ka sahifa hai hamari zindagi

hum nahate hain muqaddas aayaton ki jhil mein

wadi-e-hasrat mein 'jami' hadisa aisa hua

karb ka tufan uTTha qahqahon ki jhil mein