har manzil mein har raste mein sach apne kaam aaya hai

har manzil meñ har raste meñ sach apne kaam aayā hai

ham ne jhūTe logoñ ko aksar ghar tak pahuñchāyā hai

va.ada-shikan vo laakh sahī par mujh ko hairāñ karne ko

kabhī kabhī to mujh se milne va.ade par bhī aayā hai

chashm-e-tamāshā bhī sharminda hairat meñ ā.īne bhī

vaqt kī dhuup ne kaisā kaisā chehroñ ko jhulsāyā hai

vo jo diyā raushan hī nahīñ hai us ke liye rahmat kaisī

kyuuñ ye tez havā kā jhoñkā ghar meñ mire dar aayā hai

ham bhī ab se ba-qaul-e-'hālī' duniyā ko jhuTlāeñge

aaj talak is duniyā ne ham sachchoñ ko jhuThlāyā hai

kis ḳhāmoshī se palTī hai 'ḳhāvar' vo mauj-e-dariyā

jis mauj-e-dariyā ne mujh ko sāhil par pahuñchāyā hai

har manzil mein har raste mein sach apne kaam aaya hai

hum ne jhuTe logon ko aksar ghar tak pahunchaya hai

wada-shikan wo lakh sahi par mujh ko hairan karne ko

kabhi kabhi to mujh se milne wade par bhi aaya hai

chashm-e-tamasha bhi sharminda hairat mein aaine bhi

waqt ki dhup ne kaisa kaisa chehron ko jhulsaya hai

wo jo diya raushan hi nahin hai us ke liye rahmat kaisi

kyun ye tez hawa ka jhonka ghar mein mere dar aaya hai

hum bhi ab se ba-qaul-e-'haali' duniya ko jhuTlaenge

aaj talak is duniya ne hum sachchon ko jhuThlaya hai

kis KHamoshi se palTi hai 'KHawar' wo mauj-e-dariya

jis mauj-e-dariya ne mujh ko sahil par pahunchaya hai