har marhala-e-shauq ka izhaar karenge

har marhala-e-shauq kā iz.hār kareñge

dil un kī mohabbat meñ giraftār kareñge

maanā ki guzar jā.egī ye zulm kī āñdhī

tajdīd-e-sitam phir bhī sitam-kār kareñge

mahrūm-e-tabī.at jo zamāne meñ rahe haiñ

vo apnī anā darpai-e-āzār kareñge

ham gardish-e-aflāk se nazroñ ko milā kar

jo faisla karnā hai sar-e-dār kareñge

tā-vaqt ki Takrā.eñ na kānoñ se sadā.eñ

dīvār ham apnī pas-e-dīvār kareñge

nafrat kī har ik shahr meñ bhaḌkā.eñge ātish

ye kaam faqat mulk ke ġhaddār kareñge

lafzoñ meñ simaT aa.egā guftār kā jaadū

lahje ko 'zafar' aap ke talvār kareñge

har marhala-e-shauq ka izhaar karenge

dil un ki mohabbat mein giraftar karenge

mana ki guzar jaegi ye zulm ki aandhi

tajdid-e-sitam phir bhi sitam-kar karenge

mahrum-e-tabiat jo zamane mein rahe hain

wo apni ana darpai-e-azar karenge

hum gardish-e-aflak se nazron ko mila kar

jo faisla karna hai sar-e-dar karenge

ta-waqt ki Takraen na kanon se sadaen

diwar hum apni pas-e-diwar karenge

nafrat ki har ek shahr mein bhaDkaenge aatish

ye kaam faqat mulk ke ghaddar karenge

lafzon mein simaT aaega guftar ka jadu

lahje ko 'zafar' aap ke talwar karenge