har marhale se yun to guzar jaegi ye sham

har marhale se yuuñ to guzar jā.egī ye shaam

le kar balā-e-dard kidhar jā.egī ye shaam

phaileñgī chaar samt sunahrī udāsiyāñ

Takrā ke koh-e-shab se bikhar jā.egī ye shaam

rag rag meñ phail jā.egā tanhā.iyoñ kā zahr

chupke se mere dil meñ utar jā.egī ye shaam

TuuTā yaqīn zaḳhmī umīdeñ siyāh ḳhvāb

kyā le ke aaj sū-e-sahar jā.egī ye shaam

Thahregī ek lamhe ko ye gardish-e-hayāt

tham jā.egī ye sub.h Thahar jā.egī ye shaam

ḳhūnīñ bahut haiñ mamlikat-e-shab kī sarhadeñ

hāthoñ meñ le ke kāsa-e-sar jā.egī ye shaam

mahkegā lafz lafz se shāhid dayār-e-sub.h

le kar mirī ġhazal kā asar jā.egī ye shaam

har marhale se yun to guzar jaegi ye sham

le kar bala-e-dard kidhar jaegi ye sham

phailengi chaar samt sunahri udasiyan

Takra ke koh-e-shab se bikhar jaegi ye sham

rag rag mein phail jaega tanhaiyon ka zahr

chupke se mere dil mein utar jaegi ye sham

TuTa yaqin zaKHmi umiden siyah KHwab

kya le ke aaj su-e-sahar jaegi ye sham

Thahregi ek lamhe ko ye gardish-e-hayat

tham jaegi ye subh Thahar jaegi ye sham

KHunin bahut hain mamlikat-e-shab ki sarhaden

hathon mein le ke kasa-e-sar jaegi ye sham

mahkega lafz lafz se shahid dayar-e-subh

le kar meri ghazal ka asar jaegi ye sham