har mauj-e-bala se hum jab jab kashti-e-dil Takraate hain

har mauj-e-balā se ham jab jab kashti-e-dil Takrāte haiñ

tūfān kī nabzeñ Dūbtī haiñ sāhil ko pasīne aate haiñ

ham un kī mahfil meñ apnā afsāna-e-ġham dohrāte haiñ

dil aur taḌapne lagtā hai jab dād-e-vafā kuchh paate haiñ

ālām jahāñ ke is dil par kyā mashq-e-sitam farmāte haiñ

nāgin kī tarah bal khāte haiñ sāñpoñ kī tarah lahrāte haiñ

tash.hīr-o-numā.ish kī goyā pardāz se dil bahlāte haiñ

duniyā meñ ka.ī aise haiñ jinheñ surḳhāb ke par lag jaate haiñ

har tarz-e-sitam par hañs hañs kar har jaur-o-jafā par ro ro kar

dīvāne tire duniyā ko abhī ādāb-e-vafā samjhāte haiñ

kohrām sā uThtā jaatā hai ik hashr bapā ho jaatā hai

ġhalatī se agar do ashk mire dāman pe kahīñ gir jaate haiñ

har barq taḌap kar kahtī hai taḳhrīb kā rishta mujh se hai

ta.amīr-e-nasheman kī ḳhātir gulshan meñ jahāñ bhī jaate haiñ

ik jazr-o-mad kā aalam bhī vābasta-e-qismat hotā hai

insān vahīñ kuchh paatā hai ehsās jahāñ taḌpāte haiñ

duniyā meñ abhī tak baaqī haiñ jābir bhī ka.ī zālim bhī ka.ī

hairat to yahī hai ai 'mushkil' insān sabhī kahlāte haiñ

har mauj-e-bala se hum jab jab kashti-e-dil Takraate hain

tufan ki nabzen Dubti hain sahil ko pasine aate hain

hum un ki mahfil mein apna afsana-e-gham dohraate hain

dil aur taDapne lagta hai jab dad-e-wafa kuchh pate hain

aalam jahan ke is dil par kya mashq-e-sitam farmate hain

nagin ki tarah bal khate hain sanpon ki tarah lahraate hain

tashhir-o-numaish ki goya pardaz se dil bahlate hain

duniya mein kai aise hain jinhen surKHab ke par lag jate hain

har tarz-e-sitam par hans hans kar har jaur-o-jafa par ro ro kar

diwane tere duniya ko abhi aadab-e-wafa samjhate hain

kohram sa uThta jata hai ek hashr bapa ho jata hai

ghalati se agar do ashk mere daman pe kahin gir jate hain

har barq taDap kar kahti hai taKHrib ka rishta mujh se hai

tamir-e-nasheman ki KHatir gulshan mein jahan bhi jate hain

ek jazr-o-mad ka aalam bhi wabasta-e-qismat hota hai

insan wahin kuchh pata hai ehsas jahan taDpate hain

duniya mein abhi tak baqi hain jabir bhi kai zalim bhi kai

hairat to yahi hai ai 'mushkil' insan sabhi kahlate hain