har mausam barsat ka mausam

har mausam barsāt kā mausam

be-qābū jazbāt kā mausam

merī bāñsurī us ke laboñ par

ho to ho naġhmāt kā mausam

baat pate kī kah jaatā hai

baat baat meñ baat kā mausam

koī mūrtī ban jā.egī

aaya hai him-pāt kā mausam

kore kāġhaz par likkhā hai

hoñToñ kī harkāt kā mausam

ham chāheñ to aa saktā hai

vo shīrīñ kalmāt kā mausam

tire bin jīvan hai jaise

bin bādal barsāt kā mausam

ḳhushk laboñ se kuchh kahtā hai

bhīgī bhīgī raat kā mausam

merā rishte-dār huā hai

mere dard kī zaat kā mausam

aañsū ko bhī paanī kar de

āñkhoñ ke hālāt kā mausam

baañT rahe gul mahak tabassum

phir aaya ḳhairāt kā mausam

āñkheñ band karūñ to dekhūñ

ek nazar meñ ghaat kā mausam

hai shatranj hī jīvan apnā

pai-dar-pai shah maat kā mausam

aane vaalā hai aa.egā

mere ghar barkāt kā mausam

nahīñ badaltā nahīñ badaltā

insāñ kī ādāt kā mausam

zaḳhm-e-dil ko sahlātā hai

narm narm us haath kā mausam

tum jo aañkh uThā kar dekho

raat meñ ho barsāt kā mausam

har titlī ke ḳhvāb meñ aa.e

phūloñ kī barsāt kā mausam

ham se pūchho kyā hotā hai

insānī āfāt kā mausam

bin pūchhe kyoñ aa jaatā hai

talḳh talḳh sī baat kā mausam

chāñd kī kirneñ le aatī haiñ

dil se dil kī baat kā mausam

phir phir yaad aatā hai 'panchhī'

guzar ga.e lamhāt kā mausam

har mausam barsat ka mausam

be-qabu jazbaat ka mausam

meri bansuri us ke labon par

ho to ho naghmat ka mausam

baat pate ki kah jata hai

baat baat mein baat ka mausam

koi murti ban jaegi

aaya hai him-pat ka mausam

kore kaghaz par likkha hai

honTon ki harkat ka mausam

hum chahen to aa sakta hai

wo shirin kalmat ka mausam

tere bin jiwan hai jaise

bin baadal barsat ka mausam

KHushk labon se kuchh kahta hai

bhigi bhigi raat ka mausam

mera rishte-dar hua hai

mere dard ki zat ka mausam

aansu ko bhi pani kar de

aankhon ke haalat ka mausam

banT rahe gul mahak tabassum

phir aaya KHairaat ka mausam

aankhen band karun to dekhun

ek nazar mein ghat ka mausam

hai shatranj hi jiwan apna

pai-dar-pai shah mat ka mausam

aane wala hai aaega

mere ghar barkat ka mausam

nahin badalta nahin badalta

insan ki aadat ka mausam

zaKHm-e-dil ko sahlata hai

narm narm us hath ka mausam

tum jo aankh uTha kar dekho

raat mein ho barsat ka mausam

har titli ke KHwab mein aae

phulon ki barsat ka mausam

hum se puchho kya hota hai

insani aafat ka mausam

bin puchhe kyon aa jata hai

talKH talKH si baat ka mausam

chand ki kirnen le aati hain

dil se dil ki baat ka mausam

phir phir yaad aata hai 'panchhi'

guzar gae lamhat ka mausam