har nafas taza musibat umr bhar dekha kiye

har nafas taaza musībat umr bhar dekhā kiye

dekhne kī shai na thī duniyā magar dekhā kiye

jis qayāmat se Darātā bhī hai Dartā bhī hai shaiḳh

Thokaroñ meñ aap kī shām-o-sahar dekhā kiye

tum to āsūda shab-e-va.ada the ḳhvāb-e-nāz meñ

shab se le kar sub.h tak ham sū-e-dar dekhā kiye

barhamī un kī adū ke zulm gardūñ ke sitam

ye to dekho āfateñ ham kis qadar dekhā kiye

allāh allāh kis qadar thā naaz un kī diid par

gāhe-gāhe ḳhud ko bhī ham ik nazar dekhā kiye

aap hī ik har taraf jalva-numā the be-hijāb

aap ko dekhā kiye aur umr bhar dekhā kiye

ham ko har sajda thā 'qaisar' tāj-e-shāhī se sivā

sar kī qīmat āstān-e-dost par dekhā kiye

har nafas taza musibat umr bhar dekha kiye

dekhne ki shai na thi duniya magar dekha kiye

jis qayamat se Daraata bhi hai Darta bhi hai shaiKH

Thokaron mein aap ki sham-o-sahar dekha kiye

tum to aasuda shab-e-wada the KHwab-e-naz mein

shab se le kar subh tak hum su-e-dar dekha kiye

barhami un ki adu ke zulm gardun ke sitam

ye to dekho aafaten hum kis qadar dekha kiye

allah allah kis qadar tha naz un ki did par

gahe-gahe KHud ko bhi hum ek nazar dekha kiye

aap hi ek har taraf jalwa-numa the be-hijab

aap ko dekha kiye aur umr bhar dekha kiye

hum ko har sajda tha 'qaisar' taj-e-shahi se siwa

sar ki qimat aastan-e-dost par dekha kiye