ہر نفس تازہ ستم ہوتے ہیں

ہر نفس تازہ ستم ہوتے ہیں

جب ترے شہر میں ہم ہوتے ہیں

پھول کھلتے ہیں جو اس کے لب پر

رشک گلزار ارم ہوتے ہیں

دل میں بس جائیں جو ارماں کی طرح

ایسے اشعار تو کم ہوتے ہیں

ہم کہ ہیں شاہ دیار خوباں

ہدف تیشۂ غم ہوتے ہیں

ٹھیس لگ جائے نہ خودداری کو

لو وہ مائل بہ کرم ہوتے ہیں

غم محبوب سے بڑھ کر نہیں غم

یوں تو ہر طرح کے غم ہوتے ہیں

جن کو دیکھے سے کوئی یاد آئے

ایسے احباب بھی کم ہوتے ہیں

ذہن شاعر میں ہمیشہ اقبالؔ

نا تراشیدہ صنم ہوتے ہیں