har nafas tez aanch par kyon hai

har nafas tez aañch par kyoñ hai

ḳhauf-e-tanhā.ī is qadar kyoñ hai

ibtidā qaid intihā bhī qaid

phir ye tafhīm-e-bāl-o-par kyoñ hai

dil agar muntazir nahīñ us kā

phir ye taz.īn-e-bām-o-dar kyoñ hai

apne saa.e se bhī hai nā-vāqif

aadmī itnā be-ḳhabar kyoñ hai

be-zabāñ hai ye terī nazroñ meñ

phir tujhe aa.ine kā Dar kyoñ hai

ḳhud ko dushman bhī vo nahīñ kahtā

dost gar hai to be-zarar kyoñ hai

apne rang-e-hijāb se pūchho

'rāz' shā.ista-e-nazar kyoñ hai

har nafas tez aanch par kyon hai

KHauf-e-tanhai is qadar kyon hai

ibtida qaid intiha bhi qaid

phir ye tafhim-e-baal-o-par kyon hai

dil agar muntazir nahin us ka

phir ye tazin-e-baam-o-dar kyon hai

apne sae se bhi hai na-waqif

aadmi itna be-KHabar kyon hai

be-zaban hai ye teri nazron mein

phir tujhe aaine ka Dar kyon hai

KHud ko dushman bhi wo nahin kahta

dost gar hai to be-zarar kyon hai

apne rang-e-hijab se puchho

'raaz' shaista-e-nazar kyon hai