har nai sham suhani to nahin hoti hai

har na.ī shaam suhānī to nahīñ hotī hai

aur har 'umr javānī to nahīñ hotī hai

tum ne ehsān kiyā thā so jatāyā tum ne

jo mohabbat ho jatānī to nahīñ hotī hai

dosto sach kaho kab dil ko qarār aa.egā

har ghaḌī aas bañdhānī to nahīñ hotī hai

dil meñ jo aag lagī hai vo lagī rahne de

yaar har aag bujhānī to nahīñ hotī hai

jab bhī milte haiñ chaTak uThte haiñ kaliyoñ kī tarah

dostī ho to purānī to nahīñ hotī hai

bārhā us kī galī se ye guzar kar sochā

har galī chhoḌ ke jaanī to nahīñ hotī hai

mauj hotī hai kahīñ aur bhañvar hote haiñ

sirf dariyā meñ ravānī to nahīñ hotī hai

duur ho kar bhī vo nazdīk hai qurbat yā'nī

az-rah-e-qurb makānī to nahīñ hotī hai

shā.iba jis meñ haqīqat kā nahīñ ho 'ajmal'

vo kahānī bhī kahānī to nahīñ hotī hai

har nai sham suhani to nahin hoti hai

aur har 'umr jawani to nahin hoti hai

tum ne ehsan kiya tha so jataya tum ne

jo mohabbat ho jatani to nahin hoti hai

dosto sach kaho kab dil ko qarar aaega

har ghaDi aas bandhani to nahin hoti hai

dil mein jo aag lagi hai wo lagi rahne de

yar har aag bujhani to nahin hoti hai

jab bhi milte hain chaTak uThte hain kaliyon ki tarah

dosti ho to purani to nahin hoti hai

barha us ki gali se ye guzar kar socha

har gali chhoD ke jaani to nahin hoti hai

mauj hoti hai kahin aur bhanwar hote hain

sirf dariya mein rawani to nahin hoti hai

dur ho kar bhi wo nazdik hai qurbat ya'ni

az-rah-e-qurb makani to nahin hoti hai

shaiba jis mein haqiqat ka nahin ho 'ajmal'

wo kahani bhi kahani to nahin hoti hai