har nazare mein hain sau partaw-e-jaanan paida

har nazāre meñ haiñ sau partav-e-jānāñ paidā

kyuuñ na ho dekhne vaale meñ na.ī jaañ paidā

tarab-e-dil se bayābāñ bhī hai rashk-e-gulshan

dil ho nā-ḳhush to ho gulshan meñ bayābāñ paidā

jin kī taqdīs kī khāte haiñ farishte bhī qasam

ham gunahgāroñ meñ hote haiñ vo insāñ paidā

kar hī Dālegī havā-e-chaman-e-dahr malūl

sūrat-e-gul bhī agar koī ho ḳhandāñ paidā

zulmat-e-yās meñ ummīd kī pinhāñ thī jhalak

parda-e-shab se huā nayyar-e-tābāñ paidā

ġhaib se himmat-e-mardāna ko miltī hai madad

azm-e-rāsiḳh ho to ho jaate haiñ sāmāñ paidā

māya-e-nāzish-e-daurāñ ye pareshānī hai

roz hote haiñ kahāñ ham se pareshāñ paidā

haq ne shā.ir ke taḳhayyul ko vo qudrat baḳhshī

zarra-e-ḳhāk se kar de chamanistāñ paidā

har nazare mein hain sau partaw-e-jaanan paida

kyun na ho dekhne wale mein nai jaan paida

tarab-e-dil se bayaban bhi hai rashk-e-gulshan

dil ho na-KHush to ho gulshan mein bayaban paida

jin ki taqdis ki khate hain farishte bhi qasam

hum gunahgaron mein hote hain wo insan paida

kar hi Dalegi hawa-e-chaman-e-dahr malul

surat-e-gul bhi agar koi ho KHandan paida

zulmat-e-yas mein ummid ki pinhan thi jhalak

parda-e-shab se hua nayyar-e-taban paida

ghaib se himmat-e-mardana ko milti hai madad

azm-e-rasiKH ho to ho jate hain saman paida

maya-e-nazish-e-dauran ye pareshani hai

roz hote hain kahan hum se pareshan paida

haq ne shair ke taKHayyul ko wo qudrat baKHshi

zarra-e-KHak se kar de chamanistan paida