har paikar-e-ranai ne mujhe teri hi yaad dilai hai

har paikar-e-rānā.ī ne mujhe terī hī yaad dilā.ī hai

kuchh ishq mirā harjā.ī hai kuchh husn tirā harjā.ī hai

haañ soch samajh kar jān-e-vafā maiñ vo patthar huuñ kināre kā

jo mauj bhañvar se niklī hai uTh kar mujh se Takrā.ī hai

Thahrāv hai vaz-e-sāhil meñ tūfāñ to nahīñ barpā dil meñ

kajlā to chalā hai angāra aise meñ havā purvā.ī hai

chāhat meñ kisī kī jiitā huuñ sūrat pe kisī kī martā huuñ

ye jiinā mujh ko bhāyā hai ye maut mujhe raas aa.ī hai

kuchh terā bhī armān rahe aur kuchh apnā bhī dhyān rahe

itnī to mujhe pahchān rahe ye vasl hai yā tanhā.ī hai

ye lambī raat ye be-ḳhvābī ye karvaT karvaT betābī

mausam ke basantī chhīñToñ ne kyā aag jigar meñ lagā.ī hai

ai ahl-e-ḳhirad ham dīvāne jab sū-e-chaman jā nikle haiñ

kāñToñ ko sar par rakkhā hai phūloñ se aañkh churā.ī hai

har paikar-e-ranai ne mujhe teri hi yaad dilai hai

kuchh ishq mera harjai hai kuchh husn tera harjai hai

han soch samajh kar jaan-e-wafa main wo patthar hun kinare ka

jo mauj bhanwar se nikli hai uTh kar mujh se Takrai hai

Thahraw hai waz-e-sahil mein tufan to nahin barpa dil mein

kajla to chala hai angara aise mein hawa purwai hai

chahat mein kisi ki jita hun surat pe kisi ki marta hun

ye jina mujh ko bhaya hai ye maut mujhe ras aai hai

kuchh tera bhi arman rahe aur kuchh apna bhi dhyan rahe

itni to mujhe pahchan rahe ye wasl hai ya tanhai hai

ye lambi raat ye be-KHwabi ye karwaT karwaT betabi

mausam ke basanti chhinTon ne kya aag jigar mein lagai hai

ai ahl-e-KHirad hum diwane jab su-e-chaman ja nikle hain

kanTon ko sar par rakkha hai phulon se aankh churai hai