ہر قدم پر مرے اک خنجر عریاں نکلا

ہر قدم پر مرے اک خنجر عریاں نکلا

پھر بھی میں کوچۂ قاتل سے غزل خواں نکلا

کر گئی مجھ پہ وہ اعجاز تری ایک نظر

جو بھی نکلا مرے نزدیک سے حیراں نکلا

میری فطرت میں تھی پنہاں وہ بہار دائم

میں بہر رنگ بہ شکل گل خنداں نکلا

وہ بدلتا رہا ہر بات کے اتنے پہلو

مدعا کوئی بھی ہرگز نہ نمایاں نکلا

آہ اس طور گلستاں میں لٹی فصل بہار

چشم گریاں سے مری خون بہاراں نکلا

جانے کس غم نے وہ تحریک مسرت بخشی

دل غمگیں سے مرے نغمۂ شاداں نکلا

حرم و دیر کی ہر قید سے مطلق آزاد

مجھ سا کافر ہی کوئی صاحب ایماں نکلا

آپ پر ہو چکا سو جان سے قرباں لیکن

آپ پر مٹنے کا اس دل سے نہ ارماں نکلا

حوصلہ ہو تو مرا اور تعاقب کر لے

تجھ سے میں تیز قدم گردش دوراں نکلا

ایک ہی جھونکے نے گل کر دئے سب گھر کے چراغ

اس قدر تند ادھر سے کوئی طوفاں نکلا

سخن رازؔ کی دی داد کسی نے آخر

شکر ہے بزم میں کوئی تو سخنداں نکلا