har qadam par mere ek KHanjar-e-uryan nikla

har qadam par mire ik ḳhanjar-e-uryāñ niklā

phir bhī maiñ kūcha-e-qātil se ġhazal-ḳhvāñ niklā

kar ga.ī mujh pe vo e.ajāz tirī ek nazar

jo bhī niklā mire nazdīk se hairāñ niklā

merī fitrat meñ thī pinhāñ vo bahār-e-dā.im

maiñ bahar-rang ba-shakl-e-gul-e-ḳhandāñ niklā

vo badaltā rahā har baat ke itne pahlū

mudda.ā koī bhī hargiz na numāyāñ niklā

aah is taur gulistāñ meñ luTī fasl-e-bahār

chashm-e-giryāñ se mirī ḳhūn-e-bahārāñ niklā

jaane kis ġham ne vo tahrīk-e-masarrat baḳhshī

dil-e-ġham-gīñ se mire naġhma-e-shādāñ niklā

haram-o-dair kī har qaid se mutlaq āzād

mujh sā kāfir hī koī sāhab-e-īmāñ niklā

aap par ho chukā sau jaan se qurbāñ lekin

aap par miTne kā is dil se na armāñ niklā

hausla ho to mirā aur ta.āqub kar le

tujh se maiñ tez qadam gardish-e-daurāñ niklā

ek hī jhoñke ne gul kar diye sab ghar ke charāġh

is qadar tund idhar se koī tūfāñ niklā

suḳhan-e-'rāz' kī dī daad kisī ne āḳhir

shukr hai bazm meñ koī to suḳhan-dāñ niklā

har qadam par mere ek KHanjar-e-uryan nikla

phir bhi main kucha-e-qatil se ghazal-KHwan nikla

kar gai mujh pe wo eajaz teri ek nazar

jo bhi nikla mere nazdik se hairan nikla

meri fitrat mein thi pinhan wo bahaar-e-daim

main bahar-rang ba-shakl-e-gul-e-KHandan nikla

wo badalta raha har baat ke itne pahlu

muddaa koi bhi hargiz na numayan nikla

aah is taur gulistan mein luTi fasl-e-bahaar

chashm-e-giryan se meri KHun-e-bahaaran nikla

jaane kis gham ne wo tahrik-e-masarrat baKHshi

dil-e-gham-gin se mere naghma-e-shadan nikla

haram-o-dair ki har qaid se mutlaq aazad

mujh sa kafir hi koi sahab-e-iman nikla

aap par ho chuka sau jaan se qurban lekin

aap par miTne ka is dil se na arman nikla

hausla ho to mera aur taaqub kar le

tujh se main tez qadam gardish-e-dauran nikla

ek hi jhonke ne gul kar diye sab ghar ke charagh

is qadar tund idhar se koi tufan nikla

suKHan-e-'raaz' ki di dad kisi ne aaKHir

shukr hai bazm mein koi to suKHan-dan nikla