har rang-e-be-hijab KHabar hai hijab ki

har rang-e-be-hijāb ḳhabar hai hijāb kī

zauq-e-nazar se pūchhiye qīmat naqāb kī

sūrat bhaTak rahī hai nazar meñ shabāb kī

fursat savāl kī hai na mohlat javāb kī

rījhī huī hai un pe nazar māhtāb kī

qismat chamak rahī hai mire intiḳhāb kī

jin kī halāvateñ hoñ mayassar shabāb kī

un par na kyoñ harām ho talḳhī sharāb kī

phir yaad aa ga.ī kisī mast-e-shabāb kī

dā'vat sī mil rahī hai nazar ko sharāb kī

baaqī rahī na jab koī sūrat savāb kī

chashm-e-butāñ ne soch ke bai'at sharāb kī

taklīf dījiye na laboñ ko javāb kī

āñkhoñ se āshkār hai marzī janāb kī

miTTī 'azīz hai dil-e-ḳhāna-ḳharāb kī

bedāriyoñ meñ so ga.ī tā'bīr ḳhvāb kī

aamad hai gulsitāñ meñ kisī sabz-gām kī

har shāḳh par bikher huī hai gulāb kī

har dil kī pāsdār hai ik jān-e-dilbarī

har najm-o-māh meñ hai kiran āftāb kī

har jām-e-tishna-kām karam kā hai muntazir

ye kis ke haath meñ hai surāhī sharāb kī

mahñgā paḌegā shauq tujhe nā-murād dil

kyoñ rag phaḌak rahī hai tire iztirāb kī

haiñ 'shād' aaj aap kisī bazm-e-ġhair meñ

tā'rīf ho rahī hai sunā hai janāb kī

har rang-e-be-hijab KHabar hai hijab ki

zauq-e-nazar se puchhiye qimat naqab ki

surat bhaTak rahi hai nazar mein shabab ki

fursat sawal ki hai na mohlat jawab ki

rijhi hui hai un pe nazar mahtab ki

qismat chamak rahi hai mere intiKHab ki

jin ki halawaten hon mayassar shabab ki

un par na kyon haram ho talKHi sharab ki

phir yaad aa gai kisi mast-e-shabab ki

da'wat si mil rahi hai nazar ko sharab ki

baqi rahi na jab koi surat sawab ki

chashm-e-butan ne soch ke bai'at sharab ki

taklif dijiye na labon ko jawab ki

aankhon se aashkar hai marzi janab ki

miTTi 'aziz hai dil-e-KHana-KHarab ki

bedariyon mein so gai ta'bir KHwab ki

aamad hai gulsitan mein kisi sabz-gam ki

har shaKH par bikher hui hai gulab ki

har dil ki pasdar hai ek jaan-e-dilbari

har najm-o-mah mein hai kiran aaftab ki

har jam-e-tishna-kaam karam ka hai muntazir

ye kis ke hath mein hai surahi sharab ki

mahnga paDega shauq tujhe na-murad dil

kyon rag phaDak rahi hai tere iztirab ki

hain 'shad' aaj aap kisi bazm-e-ghair mein

ta'rif ho rahi hai suna hai janab ki