har rose hi imroz ko farda na karoge

har roz hī imroz ko fardā na karoge

va.ada ye karo phir kabhī va.adā na karoge

ye maan liyā ahd-e-vafā bhuul chuke ho

kyā bhuul ke bhī tum hameñ chāhā na karoge

mahfil se hī uTh jā.eñge ham aise qabā-chāk

vahshat kā hamārī kabhī shikvā na karoge

achchhā thā ki jab āriza-e-hijr nahīñ thā

achchhā hai ki ab tum kabhī achchhā na karoge

jis raaz meñ shāmil hai hamārā bhī fasāna

us raaz ko kyā ham pe bhī ifshā na karoge

mar jā.egā dil hasrat-e-anvār-e-sahar meñ

be-parda agar tum ruḳh-e-zebā na karoge

kyā aur na thā tark-e-ta.alluq kā bahāna

sunte haiñ ki ab tum hameñ rusvā na karoge

samjho to 'zahīr' un kī nigāhoñ ke ishāre

kyā aaj bhī iz.hār-e-tamannā na karoge

har roz hi imroz ko farda na karoge

wada ye karo phir kabhi wada na karoge

ye man liya ahd-e-wafa bhul chuke ho

kya bhul ke bhi tum hamein chaha na karoge

mahfil se hi uTh jaenge hum aise qaba-chaak

wahshat ka hamari kabhi shikwa na karoge

achchha tha ki jab aariza-e-hijr nahin tha

achchha hai ki ab tum kabhi achchha na karoge

jis raaz mein shamil hai hamara bhi fasana

us raaz ko kya hum pe bhi ifsha na karoge

mar jaega dil hasrat-e-anwar-e-sahar mein

be-parda agar tum ruKH-e-zeba na karoge

kya aur na tha tark-e-talluq ka bahana

sunte hain ki ab tum hamein ruswa na karoge

samjho to 'zahir' un ki nigahon ke ishaare

kya aaj bhi izhaar-e-tamanna na karoge