har roz jo mar jaane ka elan karo ho

har roz jo mar jaane kā elaan karo ho

sach bolo ki tum kis kī mohabbat meñ maro ho

kis tarah yaqīñ ho ki kabhī aan miloge

jab duur se tum aañkh milāne se Daro ho

anjām kī talḳhī ko nigāhoñ meñ samo.e

kyoñ ḳhuun mire jazb-e-tamannā kā karo ho

dekhe pe to karte ho shanāsā.ī se inkār

suntā huuñ ki tum mere liye aaheñ bharo ho

zulfoñ kī ghaTā se ruḳh-e-raushan ko chhupā kar

tum din meñ siyah raat kī tashkīl karo ho

bārāt sitāroñ kī nikal aatī hai us dam

tārīkī meñ jab maañg ko afshāñ se bharo ho

maqbūl haiñ 'hasrat' yūñhī ash.ār tumhāre

tum sahl-bayānī meñ ġhazal pesh karo ho

har roz jo mar jaane ka elan karo ho

sach bolo ki tum kis ki mohabbat mein maro ho

kis tarah yaqin ho ki kabhi aan miloge

jab dur se tum aankh milane se Daro ho

anjam ki talKHi ko nigahon mein samoe

kyon KHun mere jazb-e-tamanna ka karo ho

dekhe pe to karte ho shanasai se inkar

sunta hun ki tum mere liye aahen bharo ho

zulfon ki ghaTa se ruKH-e-raushan ko chhupa kar

tum din mein siyah raat ki tashkil karo ho

baraat sitaron ki nikal aati hai us dam

tariki mein jab mang ko afshan se bharo ho

maqbul hain 'hasrat' yunhi ashaar tumhaare

tum sahl-bayani mein ghazal pesh karo ho