har roz pahle roz se behtar mila hai KHauf

har roz pahle roz se behtar milā hai ḳhauf

aisā nahīñ ki ek hī jaisā rahā hai ḳhauf

jis ne tumhārī niiñd kī duniyā ujaaḌ dī

mujh ko bhī ek aisī hī āvāz kā hai ḳhauf

mere mizāj kā hai mirā aks ḳhadd-o-ḳhāl

sab se alag-thalag huuñ maiñ sab se judā hai ḳhauf

ye kā.enāt donoñ kī marzī se hai banī

terī atā hai zindagī merī atā hai ḳhauf

apnā bhī haath chhūne se Dar jaa.e aadmī

merī samajh meñ aa chukā kitnā burā hai ḳhauf

terī atā se baḌh ke to mumkin nahīñ hai dost

itnā hī khā rahā huuñ maiñ jitnā diyā hai ḳhauf

mere liye hai habs kā mausam balā-e-jāñ

jaise diye ke vāste biphrī havā hai ḳhauf

ye soch mere vāste hai mas.ala banī

tujh meñ ḳhudā kā ḳhauf hai yā phir ḳhudā hai ḳhauf

ik roz shahr-e-yār pe ban jā.egā azaab

achchhā hai ahl-e-shahr meñ jo pal rahā hai ḳhauf

'shāhid' adam kā honā aur na honā jaan le

ya.anī vajūd raushnī hai aur ḳhalā hai ḳhauf

har roz pahle roz se behtar mila hai KHauf

aisa nahin ki ek hi jaisa raha hai KHauf

jis ne tumhaari nind ki duniya ujaD di

mujh ko bhi ek aisi hi aawaz ka hai KHauf

mere mizaj ka hai mera aks KHadd-o-KHal

sab se alag-thalag hun main sab se juda hai KHauf

ye kaenat donon ki marzi se hai bani

teri ata hai zindagi meri ata hai KHauf

apna bhi hath chhune se Dar jae aadmi

meri samajh mein aa chuka kitna bura hai KHauf

teri ata se baDh ke to mumkin nahin hai dost

itna hi kha raha hun main jitna diya hai KHauf

mere liye hai habs ka mausam bala-e-jaan

jaise diye ke waste biphri hawa hai KHauf

ye soch mere waste hai masala bani

tujh mein KHuda ka KHauf hai ya phir KHuda hai KHauf

ek roz shahr-e-yar pe ban jaega azab

achchha hai ahl-e-shahr mein jo pal raha hai KHauf

'shahid' adam ka hona aur na hona jaan le

yani wajud raushni hai aur KHala hai KHauf