har sans mein shamil rahte hain har KHwab sanwara karte hain

har saañs meñ shāmil rahte haiñ har ḳhvāb sañvārā karte haiñ

kyā kyā na hamārī ḳhātir vo taklīf gavārā karte haiñ

sajdoñ se talāfī ho kyūñkar hairān-o-pareshāñ haiñ ḳhud-sar

vo bojh jo hotā hai dil par kis tarah utārā karte haiñ

har haal meñ haiñ rāzī-ba-razā ham ahl-e-yaqīñ ham ahl-e-vafā

hai kaun hamārā tere sivā tujh hī ko pukārā karte haiñ

kyā jāniye kyā hai qismat meñ ai shāḳh-e-nasheman ḳhair tirī

bijlī bhī bahut kuchh kahtī hai bādal bhī ishārā karte haiñ

ik mauj qayāmat Dhātī hai ik mauj sahārā detī hai

tūfāñ hī Dubote haiñ kashtī tūfāñ hī ubhārā karte haiñ

ehsās kahāñ pheñk aa.eñ ham alfāz kahāñ se laa.eñ ham

kis dil se kise samjhā.eñ ham jo kuchh bhī nazārā karte haiñ

jāñ-bāz kahāñ dil-bāz haiñ sab lekin ye haqīqat hai 'rāhī'

kuchh haar ke jiitā karte haiñ kuchh jiit ke haarā karte haiñ

jo azm-e-amal ke paikar haiñ vo log hī 'rāhī' bartar haiñ

vo be-his kankar patthar haiñ jo vaqt guzārā karte haiñ

har sans mein shamil rahte hain har KHwab sanwara karte hain

kya kya na hamari KHatir wo taklif gawara karte hain

sajdon se talafi ho kyunkar hairan-o-pareshan hain KHud-sar

wo bojh jo hota hai dil par kis tarah utara karte hain

har haal mein hain raazi-ba-raza hum ahl-e-yaqin hum ahl-e-wafa

hai kaun hamara tere siwa tujh hi ko pukara karte hain

kya jaaniye kya hai qismat mein ai shaKH-e-nasheman KHair teri

bijli bhi bahut kuchh kahti hai baadal bhi ishaara karte hain

ek mauj qayamat Dhati hai ek mauj sahaara deti hai

tufan hi Dubote hain kashti tufan hi ubhaara karte hain

ehsas kahan phenk aaen hum alfaz kahan se laen hum

kis dil se kise samjhaen hum jo kuchh bhi nazara karte hain

jaan-baz kahan dil-baz hain sab lekin ye haqiqat hai 'rahi'

kuchh haar ke jita karte hain kuchh jit ke haara karte hain

jo azm-e-amal ke paikar hain wo log hi 'rahi' bartar hain

wo be-his kankar patthar hain jo waqt guzara karte hain