har safar ke baad waisa hi safar rakkha gaya

har safar ke baa'd vaisā hī safar rakkhā gayā

aur phir maqsūm merā dar-ba-dar rakkhā gayā

arsa-e-dasht-e-talab ko intihā baḳhshī ga.ī

mohlat-e-umr-e-ravāñ ko muḳhtasar rakkhā gayā

ham kahāñ siine kī tah meñ ye samundar thāmte

ek us ḳhātir tujhe ai chashm-e-tar rakkhā gayā

hāsil-e-jāñ par ḳhas-o-ḳhāshāk-e-hasrat khīñch kar

darmiyāñ us dil ke ḳhvāhish kā sharar rakkhā gayā

bosa-e-ḳhurshīd se kholā sahar kā pairahan

zānū-e-shab par mah-e-kāmil kā sar rakkhā gayā

din ke rastoñ par bichā.ī nā-rasā.ī kī thakan

niiñd kī dahlīz par ḳhvāboñ kā par rakkhā gayā

muztarib rahtī hai koh-o-dasht meñ jaise havā

is tarah siine meñ sāñsoñ kā guzar rakkhā gayā

āte-jāte har-nafas meñ maut kā thā zā.iqa

rā.egāñ jiine meñ marne kā hunar rakkhā gayā

ḳhvāhisheñ jāgeñ jamāl-e-yār ke dīdār se

pāniyoñ par māh-e-uryāñ kā asar rakkhā gayā

umr bhar 'sarmad' thī jis ko yaad rakhne kī sazā

sāmnā us shoḳh se ik lamha bhar rakkhā gayā

har safar ke ba'd waisa hi safar rakkha gaya

aur phir maqsum mera dar-ba-dar rakkha gaya

arsa-e-dasht-e-talab ko intiha baKHshi gai

mohlat-e-umr-e-rawan ko muKHtasar rakkha gaya

hum kahan sine ki tah mein ye samundar thamte

ek us KHatir tujhe ai chashm-e-tar rakkha gaya

hasil-e-jaan par KHas-o-KHashak-e-hasrat khinch kar

darmiyan us dil ke KHwahish ka sharar rakkha gaya

bosa-e-KHurshid se khola sahar ka pairahan

zanu-e-shab par mah-e-kaamil ka sar rakkha gaya

din ke raston par bichai na-rasai ki thakan

nind ki dahliz par KHwabon ka par rakkha gaya

muztarib rahti hai koh-o-dasht mein jaise hawa

is tarah sine mein sanson ka guzar rakkha gaya

aate-jate har-nafas mein maut ka tha zaiqa

raegan jine mein marne ka hunar rakkha gaya

KHwahishen jagen jamal-e-yar ke didar se

paniyon par mah-e-uryan ka asar rakkha gaya

umr bhar 'sarmad' thi jis ko yaad rakhne ki saza

samna us shoKH se ek lamha bhar rakkha gaya