har samt ek dhuan hai har gam tirgi hai

har samt ik dhuāñ hai har gaam tīrgī hai

duniyā tire safar meñ ye kaisī raushnī hai

zulmat kī rah-guzar pe ulfat sisak rahī hai

ye kaun be-hisī hai ye kaun bebasī hai

tanhā hī chal rahe ham manzil kī aarzū meñ

har sub.h ajnabī hai har shaam ajnabī hai

apnī hī dhun meñ sab haiñ har shaḳhs dar-ba-dar hai

ye kaisī justujū hai ye kaisī tishnagī hai

ham mar ke jī rahe haiñ ḳhvāboñ kī anjuman meñ

nākām hasrateñ haiñ gumnām zindagī hai

'ābid' tumhāre haq meñ har lab pe ik gila hai

har dil meñ ik chubhan hai har aañkh shabnamī hai

har samt ek dhuan hai har gam tirgi hai

duniya tere safar mein ye kaisi raushni hai

zulmat ki rah-guzar pe ulfat sisak rahi hai

ye kaun be-hisi hai ye kaun bebasi hai

tanha hi chal rahe hum manzil ki aarzu mein

har subh ajnabi hai har sham ajnabi hai

apni hi dhun mein sab hain har shaKHs dar-ba-dar hai

ye kaisi justuju hai ye kaisi tishnagi hai

hum mar ke ji rahe hain KHwabon ki anjuman mein

nakaam hasraten hain gumnam zindagi hai

'abid' tumhaare haq mein har lab pe ek gila hai

har dil mein ek chubhan hai har aankh shabnami hai