har samt qayamat si bapa dekh raha hun

har samt qayāmat sī bapā dekh rahā huuñ

maiñ dekh rahā huuñ ki ye kyā dekh rahā huuñ

har shaḳhs ko mā.il-ba-riyā dekh rahā huuñ

phailī huī har-sū ye vabā dekh rahā huuñ

bejā hai ye kahnā ki bajā dekh rahā huuñ

dānāoñ ke ausān ḳhatā dekh rahā huuñ

ab ai mire allāh tū kyā dekh rahā hai

kyā dekh rahā hai tū maiñ kyā dekh rahā huuñ

āñkheñ haiñ magar kuchh bhī dikhā.ī nahīñ detā

yuuñ dekhne ko arz-o-samā dekh rahā huuñ

insān kisī haal meñ ḳhush rah nahīñ saktā

har lamha use nāla-sarā dekh rahā huuñ

hogī ki nahīñ eid kisī tishna-dahan kī

hogā ki nahīñ mai-kada vā dekh rahā huuñ

dekho to sahī aañkh ke andhe ne kahā jab

ik aql ke andhe ne kahā dekh rahā huuñ

ek aañkh nahīñ dekh sakā haif idhar to

maiñ raah tirī rāh-numā dekh rahā huuñ

har samt qayamat si bapa dekh raha hun

main dekh raha hun ki ye kya dekh raha hun

har shaKHs ko mail-ba-riya dekh raha hun

phaili hui har-su ye waba dekh raha hun

beja hai ye kahna ki baja dekh raha hun

danaon ke ausan KHata dekh raha hun

ab ai mere allah tu kya dekh raha hai

kya dekh raha hai tu main kya dekh raha hun

aankhen hain magar kuchh bhi dikhai nahin deta

yun dekhne ko arz-o-sama dekh raha hun

insan kisi haal mein KHush rah nahin sakta

har lamha use nala-sara dekh raha hun

hogi ki nahin eid kisi tishna-dahan ki

hoga ki nahin mai-kada wa dekh raha hun

dekho to sahi aankh ke andhe ne kaha jab

ek aql ke andhe ne kaha dekh raha hun

ek aankh nahin dekh saka haif idhar to

main rah teri rah-numa dekh raha hun