har samt se uThta hai dhuan shahr ke logo

har samt se uThtā hai dhuāñ shahr ke logo

ye shahr to thā shahr-e-amāñ shahr ke logo

dīvāngī-e-ahl-e-ḳhirad pahuñchī yahāñ tak

har shaḳhs kā chehra hai dhuāñ shahr ke logo

rif.at kise miltī hai farāvānī-e-zar se

kirdār se ho faḳhr-e-zamāñ shahr ke logo

le aa.ī yahāñ tak hameñ kirdār kī pastī

azmat hai na azmat ke nishāñ shahr ke logo

parvarda-e-īmān-o-yaqīñ hote hue bhī

ye vasvasa-e-vahm-o-gumāñ shahr ke logo

pheñko na ḳhamoshī pe mirī tanz ke patthar

ab bhī hai mire muñh meñ zabāñ shahr ke logo

patthar kī chaTānoñ se rukā hai na rukegā

'in.ām' hai ik jū-e-ravāñ shahr ke logo

har samt se uThta hai dhuan shahr ke logo

ye shahr to tha shahr-e-aman shahr ke logo

diwangi-e-ahl-e-KHirad pahunchi yahan tak

har shaKHs ka chehra hai dhuan shahr ke logo

rifat kise milti hai farawani-e-zar se

kirdar se ho faKHr-e-zaman shahr ke logo

le aai yahan tak hamein kirdar ki pasti

azmat hai na azmat ke nishan shahr ke logo

parwarda-e-iman-o-yaqin hote hue bhi

ye waswasa-e-wahm-o-guman shahr ke logo

phenko na KHamoshi pe meri tanz ke patthar

ab bhi hai mere munh mein zaban shahr ke logo

patthar ki chaTanon se ruka hai na rukega

'inam' hai ek ju-e-rawan shahr ke logo