har samt sulagta hai ghurbat ka sharar ab tak

har samt sulagtā hai ġhurbat kā sharar ab tak

roTī ko tarastā hai duniyā meñ bashar ab tak

tum jitnā sitam Dhā lo lekin ye haqīqat hai

mazlūm kī aahoñ meñ baaqī hai asar ab tak

jis samt nazar uTThe us samt bahārāñ ho

tujh sā to nahīñ dekhā andāz-e-nazar ab tak

din raat mohabbat meñ martā hī rahā jis par

us ko na milī mere marne kī ḳhabar ab tak

jis raah se muḌ kar ham aa.e the ajī sāhib

bhūle se kabhī ham ne dekhā na udhar ab tak

tum merī rifāqat meñ jis raah se guzre the

maiñ bhuul nahīñ paayā vo rāhguzar ab tak

kis tarah kī bastī meñ ham aa ke base 'sārim'

kāñdhe pe liye lāsha kī ziist basar ab tak

har samt sulagta hai ghurbat ka sharar ab tak

roTi ko tarasta hai duniya mein bashar ab tak

tum jitna sitam Dha lo lekin ye haqiqat hai

mazlum ki aahon mein baqi hai asar ab tak

jis samt nazar uTThe us samt bahaaran ho

tujh sa to nahin dekha andaz-e-nazar ab tak

din raat mohabbat mein marta hi raha jis par

us ko na mili mere marne ki KHabar ab tak

jis rah se muD kar hum aae the aji sahib

bhule se kabhi hum ne dekha na udhar ab tak

tum meri rifaqat mein jis rah se guzre the

main bhul nahin paya wo rahguzar ab tak

kis tarah ki basti mein hum aa ke base 'sarim'

kandhe pe liye lasha ki zist basar ab tak