har shai mere gham ki tasir nazar aai

har shai mere ġham kī tāsīr nazar aa.ī

shām-e-shab-e-furqat bhī dil-gīr nazar aa.ī

ab daur-e-ḳhizāñ shāyad gulshan meñ qarīb aaya

kuchh aaj sabā mujh ko dil-gīr nazar aa.ī

ye ḳhāna-e-dil vo hai miTne se jo bantā hai

taḳhrīb meñ bhī is ke ta.amīr nazar aa.ī

ai josh-e-junūñ tujh par kyūñkar na tasadduq huuñ

vo din bhī ḳhudā laayā zanjīr nazar aa.ī

ye Dar hai shab-e-va.ada bahlā.ūñgā dil kyūñkar

aane meñ agar un ke tāḳhīr nazar aa.ī

phir dil meñ huī vahshat phir hosh hue ġhā.eb

phir un kī tasavvur meñ tasvīr nazar aa.ī

duniyā-e-mohabbat kī rasmeñ bhī nirālī haiñ

zillat jise samjhe the tauqīr nazar aa.ī

vo dekh ke ā.īna ḳhud apne hue shaidā

kuchh aisī unheñ dilkash tasvīr nazar aa.ī

ġham-ḳhvār na thā koī vahshī kā asīrī meñ

tanhā.ī meñ ik monis zanjīr nazar aa.ī

nāshād jo ik maiñ huuñ allāh re asar is kā

duniyā mirī nazroñ meñ dil-gīr nazar aa.ī

vo mai kī ravāñ nahreñ vo jām-o-subū dil-kash

maiḳhāne meñ jannat kī tasvīr nazar aa.ī

siine meñ tapāñ dil hai āñkhoñ se ravāñ aañsū

ye ḳhvāb-e-mohabbat kī ta.abīr nazar aa.ī

haiñ ishq-o-mohabbat ke ahkām judāgāna

majbūr yahāñ bilkul taqdīr nazar aa.ī

har shai mere gham ki tasir nazar aai

sham-e-shab-e-furqat bhi dil-gir nazar aai

ab daur-e-KHizan shayad gulshan mein qarib aaya

kuchh aaj saba mujh ko dil-gir nazar aai

ye KHana-e-dil wo hai miTne se jo banta hai

taKHrib mein bhi is ke tamir nazar aai

ai josh-e-junun tujh par kyunkar na tasadduq hun

wo din bhi KHuda laya zanjir nazar aai

ye Dar hai shab-e-wada bahlaunga dil kyunkar

aane mein agar un ke taKHir nazar aai

phir dil mein hui wahshat phir hosh hue ghaeb

phir un ki tasawwur mein taswir nazar aai

duniya-e-mohabbat ki rasmen bhi nirali hain

zillat jise samjhe the tauqir nazar aai

wo dekh ke aaina KHud apne hue shaida

kuchh aisi unhen dilkash taswir nazar aai

gham-KHwar na tha koi wahshi ka asiri mein

tanhai mein ek monis zanjir nazar aai

nashad jo ek main hun allah re asar is ka

duniya meri nazron mein dil-gir nazar aai

wo mai ki rawan nahren wo jam-o-subu dil-kash

maiKHane mein jannat ki taswir nazar aai

sine mein tapan dil hai aankhon se rawan aansu

ye KHwab-e-mohabbat ki tabir nazar aai

hain ishq-o-mohabbat ke ahkaam judagana

majbur yahan bilkul taqdir nazar aai